کاوار ئارت گولۆک ب شیوازەکێ نوو گۆت

سترانا گولۆکێ، پەیڤ و ئاواز فلکلورێ دەڤەرا جولەمێرگێ یە، گوندێ ماریفیا عەشیرەتا پنیانشییان و ل گەلەک دەڤەرێن دیتر ژی ئەڤ ستـرانە ھاتیە گۆتن، ئەڤ سترانە ریتمێ وێ ٦ ل سەر ٨ ــە و مەقامێ وێ حیجازە، ئەڤ سترانە ل وەلاتێ ئازەربایجان و تورکیا بگرە ژ ستەنبۆلێ و ھەردو باژارێن کوردان وان و ئامەدێ و ھەر دیسان ل باژێرێ دھۆکێ کار ل سەر ھاتیە کرن.
ئەڤ سترانە ب سەرپەرشتییا گشتییا مـوزیکێ ھـونەرمەند بێکەس نووری عەبدال ھاتییە بـەرھەمئینان و بدەنگێ ھونەرمەندێ گەنج ژەنیارێ ئامیرێن ریتمیک کاوار ئـارت ھاتییە سـتراندن و بەلاڤبوویە، ئەڤ سترانە ب سپۆنسەرییا گەنجێ باژێرێ دھۆکێ گەلـوان جاسمی یە، ھەر دیسان بجھئینان و دانانا شەنگستێ موزیکێ ھێرش دەرڤێش ئـۆغلویە، ھونەرمەند ل باژێرێ وانێ، ھەروەسا ستودیویا دەنگ و رەنگ ب کارێ تۆمارکرنا دەنگێ سولویستی ڕابوویە و ھونەرمەند عیماد عەلی بجھئینایە، دیسان شەک پڕۆدەکشن ب کارێ وێنەکرنا سترانێ رابوویــە، ئەڤ سترانە ب شێوازەکێ کوردی ب تامەکا رەسەن ب ژەنینا چەندین ئامیرێن موزیکێ و ب شێوازێ فۆرمێ کلاسیکا ئەوروپی تێکھەلی ئێک کرینە و ل سەر بنیاتەکێ ھارموونی و ئەکادیمی بەرھەمئینایە، ئەڤ سترانە رێکەفتی ٢٠ ئادارێ بەلاڤبوویە و پشتی بەلاڤبووی کەفتییە بەر پێلەکا رەخنەگرتنێ و چینەک ژی د گەل دایە ئەڤ جورە سترانە ھەبن، وەک موزیک و دەنگ ھەمی مەتحەکارن وەک گۆتنا ڤان جورە پەیڤێن فلکلوری تەخەکا مەزن نەرازیبوونا خوە دیاردکەن، ستافێ کاری ژی دبێژیت ستران فلکلورە و دڤێت فلکلورێ خوە ب ھەمی رەسەناتییا وێ ڤە بپارێزین و ئەو نەشیاین وێ وێرەکیێ بدەنە خوە ئێک پەیڤا فلکلوری ژی بگۆھرن، ھونەرمەند پێشی جڤاکێ خوە دبینیت نە ھەر تشتێ جڤاکی خواست دێ ھونەرمەند ب وی کاری رابیت، بەلکو ھونەرمەند بخوە شۆرەشەکە یا ئەو دخوازیت و قەناعەت پێ ھەی دێ کەت و وێ کارتێکرنێ ل جڤاکی ژی بکەت بەر ب ئاستەکێ بلند یێ رەوشەنبیرییا ھونەری و ئەدەبی ب گشتی.