نه‌ته‌نیاهۆ بۆ پێكئینانا حكومه‌تێ هاته‌ راسپاردن

ل رۆژا 23 هه‌یڤا بورى، د ده‌مێ كێمتر ژ دوو سالان، و بۆ جارا چوارێ، هه‌لبژارتنێن په‌رله‌مانێ ئیسرائیلێ ب رێڤه‌ چوون كو 6 ملیون و 500 هزار ده‌نگده‌ر بۆ هه‌لبژارتنا 120 نوونه‌رێن په‌رله‌مانى مافێ پشكداریێ د هه‌لبژارتنان دا هه‌بوون.

پشتى كو چ پارتێن پشكداربووى د هه‌لبژارتنان دا نه‌شیان ب تنێ 61 كورسیان ئانكو زۆرینه‌یا كنێست (په‌رله‌مانێ ئیسرائیل) مسۆگه‌ربكه‌ت. رۆژا سێشه‌مبى، ریۆڤین رێڤلین، سه‌رۆكێ وه‌ڵاتى، پشتى دیدار و كۆمبوونێ د‌گه‌ڵ رێبه‌رێن پارتێن سیاسیێن وه‌لاتى، داخواز ژ بنیامێن نه‌ته‌نیاهۆ كر، كو پێنگاڤان پاڤێت بۆ پێكئینانا حكومه‌تا نوو یا ئیسرائیلێ.

ئه‌ڤه‌ د ده‌مه‌كیدایه‌ كو نه‌ته‌نیاهۆ، سه‌رۆك وه‌زیرێن نوكه‌یێن وه‌لاتى، تاوانباره‌ ب گه‌نده‌لیێ و دایه‌ به‌ر دادگه‌هكرنێ.

ریۆڤین رێڤلین، سەرۆکێ ئیسڕائیلێ، به‌حسێ هندێ كر ئه‌ڤ بریاره‌ یا ب ساناهى نه‌بوو ژلایێ مه‌عنه‌وى و ره‌وشتى یڤه‌، د زانم ژى كو سه‌رۆك نابیت كه‌سه‌كى بۆ پێكئینانا حكومه‌تێ راسپارده‌ت، د ده‌مه‌كیدایه‌ كو ئه‌و كه‌سه‌ تاوانباره‌ ب گه‌نده‌لیێ، به‌لێ ل دویڤ یاسایێ و ب بریارا دادگه‌هێ، سەرۆک وەزیران، هه‌تاكو تاوان ب سه‌ر ویدا راست ده‌ركه‌ڤن، دشێت د كارێ خوه‌ دا یێ به‌رده‌وام بیت.

بنیامین نه‌ته‌نیاهۆ، 12 ساڵە وه‌كو سه‌رۆك وه‌زیرێن ئیسرائیلێ ژ‌ لایێ په‌رله‌مانێ وى  وه‌ڵاتى دهێته‌ هه‌لبژاراتن، نه‌ته‌نیاهو سه‌رۆكێ حیزبا لیكوده‌ كول  ساڵا 1973 هاتییه‌ دامه‌زراندن ‌و پتر ل گه‌ڵ هێزێن نه‌ته‌وه‌یی و ئایینی یێن ئیسرائیلێ به‌ره‌یه‌كی هه‌ڤپشك پێكدئینن.