هه‌روه‌سا گۆتییه، وان تۆمەتان چ جۆرە بنەمایەك بۆ نییە و دوورن ژ راستییێ، پارتییا دیموكراتا كوردستانێ واقعێ سەربازی یێ هاتییه سەپاندن قه‌بوول نه‌كرییه و ژ وى ده‌مى هه‌تا نوكه مه چ ده‌مان وه‌كو پارتى ئەو پارێزگارێ هاتییه سه‌پاندن یێ نه‌قانوونى و نه‌دەستۆر ب پارێزگار نەناساندییە و ب چ شێوەیان مامه‌له ل گه‌ل نه‌كرییه.
ئه‌و ژى دیار كرییه، دڤێت رێكارێن قانوونى بگرینه به‌ر ل سه‌ر وى پارێزگارى، ئه‌م داخواز دكه‌ین، ڤه‌كۆلینێن هوور ب بەشدارىیا پارتی و ل ژێر چاڤدێرییا یۆئێنێ د وى بابه‌تى دا بهێته كرن، ئه‌م باش دزانین ئه‌ڤ گۆتنه و تۆمەته بۆ رێگریكرن و دروستكرنا ئاریشانه بۆ ڤه‌گه‌ریانا پارتییا مه بۆ كەركووكێ، ئه‌م رادگه‌هینین، راكان حەز بكه‌ت یان حەز نەكه‌ت، بلا یێ دلنیا بیت، كو پارتى دێ ڤه‌گه‌ریته كەركووكێ و ئەو ئیدارا نه قانوونى ب ڤى شێوێ نوكه نامینیت.
