په‌یڤدارێ حكومه‌تا هه‌رێما كوردستانێ رۆهنكرنه‌ك ل دۆر هه‌بوونا سه‌نته‌ره‌كێ تایبه‌تێ مۆسادا ئیسرائیلى ل باژێرێ هه‌ولێرێ به‌لاڤكر و راگه‌هاند، هه‌موو نوچه‌یێن ل دۆر هه‌بوونا سه‌نته‌ره‌كێ مۆسادا ئسرائیلى ل هه‌ولێرێ هاتینه به‌لاڤكرن، دوورن ژ راستیێ و ئه‌و یه‌ك بزاڤن بۆ ئالۆزكرنا رایا گشتى و تێكدانا ره‌وشا هه‌رێما كوردستانێ.
جۆتیار عادل، په‌یڤدارێ حكومه‌تا هه‌رێمێ د رۆهنكرنه‌كێ دا راگه‌هاند، كه‌نالێ تێله‌ڤزیۆنا ئێراقى ئافات د مالپه‌رێ خوه‌دا راپورته‌ك د 22 -4-2021 به‌لاڤكریه و هه‌رێما كوردستنا تاوانباركرییه ب مێهڤانداریا سه‌نته‌ره‌كێ مۆسادێ ل هه‌ولێرێ .
جۆتیار عادل گۆت ژى: بۆ رایا گشتى رۆهن دكه‌ن ئه‌ڤ راپۆرتا به‌لاڤكرى ب تنێ خه‌یاله و بزاڤه‌كه بۆ ئالۆزكرنا رایا گشتى و تێكدانا ره‌وشا هه‌رێما كوردستانێ و گه‌ریان ل دووڤ تاوانه‌كا ژه‌هراوى، ب ته‌مامى ژى ره‌تكر كو چ بنگه‌هێن ئیسرائیلى یان سه‌نته‌ره‌كێ وه‌سا ل هه‌رێما كوردستانێ هه‌بیت.
په‌یڤدارێ حكومه‌تا هه‌ریمێ داخواز ژ سه‌رۆكوه‌زیران و سه‌رۆكێ جڤاتا نوونه‌ران و ده‌ستهه‌لاتا دادوه‌رى یا ئێراقێ كریه ڤه‌كۆلینه‌كا رۆهن بكه‌ن و لیژنه‌كێ بۆ دیاركرنا جهێ سه‌نته‌رێ ئیسرائیلێ پێكبینن و ئه‌نجامى ژى بۆ په‌رله‌مانى بهنێرن، داكو وێ تاوانا نه‌راست و مه‌ترسیدار بۆ سه‌ر هه‌رێما كۆردستانێ داویێ پێ بینن.
