سه‌رۆك بارزانی: هیڤیه‌ پاراستنا كوردستانێ ژ ئه‌وله‌ویه‌تا هه‌ڤپه‌یمانان بیت

سه‌رۆك بارزانی ب هه‌لكه‌فتا 30 سالییا راگه‌هاندنا هه‌رێما دژه‌فرینێ سوپاسییا وان وه‌لاتان كر یێن هاریكار بۆ دروستكرنا ده‌ڤه‌را ئارام، دوپات ژی كر كو هێشتا ترسه‌كا مه‌زن ل سه‌ر هه‌رێما كوردستانێ هه‌یه‌ و داخواز كر پاراستنا كوردستانێ ژ ئه‌وله‌ویه‌تا هه‌ڤپه‌یمانان بیت.

سه‌رۆك مه‌سعوود بارزانی د گۆتاره‌كێ دا د ئێڤێنتا ل دۆر 30 سالییا راگه‌هاندنا ده‌ڤه‌را دژه‌فرینێ یا ب رێیا ئه‌نترنێتێ هاتیه‌ رێكخستن راگه‌هاند، ب درێژاهییا دیرۆكێ سته‌مه‌كا مه‌زن ل گه‌لێ كوردستانێ هاتیه‌ كرن، لێ سالێن پشتی رژێما به‌عس حكمرانییا ئیراقێ كری كاره‌ساتێن مه‌زن ب سه‌ر گه‌لێ كوردستانێ دا هاتینه‌ وه‌كو ئه‌نفال و كۆمكوژی و كیمیاباران.

سه‌رۆك بارزانی گۆت ژی: بریارا 688 یا دابینكرنا ده‌ڤه‌ره‌كا ئارام ده‌رفه‌ته‌كا زێرین بۆ گه‌لێ كوردستانێ په‌یدا كر و ئه‌و ترسێن هه‌یی ژی تا راده‌یه‌كی مه‌زن نه‌مان و خه‌لك ژی ڤه‌گه‌ریانه‌ سه‌ر مال و مولكێن خوه‌.

سه‌رۆك بارزانی سوپاسییا سه‌رۆك بۆش، سه‌رۆك میتران و مه‌دام میتران، سه‌رۆك ئۆزال، سه‌رۆكوه‌زیران جۆن مێجه‌ر كر بۆ هه‌لویست و بریارا وان یا وێره‌ك، كو پشتێ وێ گه‌لێ كوردستانێ شیا ئیدارا خوه‌ بكه‌ت و داموده‌زگه‌هێن شه‌رعی دامه‌زرینیت و هه‌لبژارتنان بكه‌ت و په‌رله‌مان وحكومه‌تا هه‌رێما كوردستانێ پێكبینیت و كوردستان بوویه‌ په‌ناگه‌هه‌ك بۆ هه‌موو لێقه‌وما و خه‌باتكارێن ئیراقێ. 

سه‌رۆك مه‌سعوود بارزانی گۆت ژی:  نها ژی گه‌لێ كوردستانێ نه‌گه‌هشتیه‌ هه‌موو ئارمانجێن خوه‌ و قۆناغا داویێ، هێشتا ترسه‌كا مه‌زن ل سه‌ر هه‌رێما كوردستانێ هه‌یه‌، داخواز ژی كر پشته‌ڤانی و هاریكاری به‌رده‌وام بن و هیڤیی خواستن پاراستنا خه‌لكێ هه‌رێما كوردستانێ ژ ئه‌وله‌ویه‌تا وان دا بیت.