سەرۆکێ زانکۆیا زاخۆ بۆ خانی نیوز راگه‌هاند، نڤیسارا وەزارەتا خواندنا بلند ل رۆژا ٩/٥/٢٠٢١ ل دۆر دانپێدانا فەرمی ژ لایێ وەزارەتا خواندنا بلند و ڤەکۆلینێن زانستی یا ئیراقا فیدرال دەرکەفتیە و ژ ڤێ رۆژێ وێڤە زانکۆیا زاخۆ دهێتە هه‌ژمارتن باوەرپێکری و بۆ سالا ٢٠٢١-٢٠٢٢ دێ بەڵگێن زانستی یێن زانکۆیا زاخۆ ژ لایێ وەزارەتا خواندنا بلند و ڤەکۆلینێن زانستی یێن ئیراقێ دەرکەڤن.
د. له‌زگین عه‌بدى، ل دۆر مفایێن ڤێ بریارێ ئاشكرا كر، بێگۆمان دێ بریارەکا ئەرێنی بیت بۆ زانکۆیا زاخۆ و هەرێما کوردستانێ، ئێدی دەرچوویێن زانکۆیا زاخۆ چ ئاریشە نابن دگەل رێکارێن خواندنا ماستەر و دکتورایێ ل وەلاتێن کو پێشتر دانپێدان ب باوەرناما قوتابیێن زانکۆیا زاخۆ نەدکر و رێگر بوون همبه‌رى پرۆسا خواندنێ بۆ دەرچوویێن زانکۆیا زاخۆ، هه‌روه‌سا وێ بریارێ دێ كارتێكرنه‌كا باشتر بۆ قوتابیێن دەرچووی هەبیت ل سەر بابەتێن دەلیڤێن کاری و دامەزراندنێ، ژبه‌ركو ئێدی قوتابیێن زانکۆیا زاخۆ دشێن ل هەموو ئیراقێ فورمێن دامەزراندنێ ل سەر میلاکێ حکومەتێ پر بكه‌ن کو پێشتر ئەڤ دەلیڤە بۆ دەرچوویێن زانکۆیا زاخۆ نەبوو.
سەرۆکێ زانکۆیا زاخۆ دیار کر ژی، ل سالا بووری سێ لژنە هاتینە پێکئینان بۆ کارکرن ل سەر دانپێدانکرنا کۆمەکا دی یا زانکۆیێن هەرێمێ، لژنەک ژ وان یا تیبەت بوو ژ بۆ زانکۆیێن پۆلیتەکنیک یێن هەرێمێ د کارێ ڤێ لژنێ دا دانپێدان ب هەردو زانکۆیێن ،هەولێر و سلێمانیێ هاتیە کرن، ب تنێ زانکۆیا دهۆک مایە و کارکرن ل سەر پرۆژێ وێ ژی بەردەوامە کو ل دەمەکێ نێزیک دانپێدان ب زانکۆیا پۆلیتەکنیک یا دهۆک ژی بهێتە کرن ژ لایێ حکومەتا ئیراقێ ڤە، لژنەکا دی ژی بۆ زانکۆیێن(هەلبجە، گەرمیان و راپەرین) هاتیە پێکئینان، لێ هێشتا کارکرن مایە، دیسان لژنەکا دی ژی کار ل سەر چەند زانکۆیێن دی یێن هەرێمێ دکەت.
خانی نیوز ، مەتین عومەر
