سه‌رۆكوه‌زیرێن ئیراقێ راگه‌هاند؛ ئه‌و حكومه‌تا من د ماوه‌یێ ساله‌كێ دا كری، 17 سالێن پێشتر نه‌هاتییه كرن ولێكتێگه‌هشتنه‌كا باش د گه‌ل كوردستانێ هه‌یه.
ب هه‌لكه‌فتا بوورینا ساله‌كێ ل سه‌ر پێكئینانا كابینه‌یا حكومه‌تا مسته‌فا كازمی و جه‌ژنا ره‌مه‌زانێ، سه‌رۆكوه‌زیرێن ئیراقێ شڤێدی د گوتاره‌كێ دا راگه‌هاند؛ لێكتێگه‌هشتنه‌كا باش دگه‌ل هه‌رێما كوردستانێ چێبوویه وه‌كو ده‌ستپێكه‌ك بۆ چاره‌كرنا هه‌موو كێشه‌یێن هه‌لاویستی، ل دۆر رێككه‌فتنا شنگالێ ژی گۆت: ئه‌و چاڤدێرییا رێككه‌فتنا شنگالێ دكه‌ن و به‌رپرساتییا حكومه‌تا ئیراقێ ل به‌رانبه‌ر كه‌سوكارێن وان یێن ئێزدی ل شنگالێ ل هه‌ردو ئاستێن كارگێری و ئێمناهیێ زێده‌كرییه بۆ وێ یه‌كێ كو ڤه‌گه‌رنه سه‌ر جهێن خوه.
كازمی ل دۆر كارێن خوه یێن د ماوه‌یێ ساله‌كێ دا كرین ژی دیاركرییه، سۆز دایه پشكداری هه‌لبژارتنان نه‌بیت و پشته‌ڤانییا هیچ حزبه‌كێ ژی نه‌كه‌ت، گۆت ژی: ئه‌و یا حكومه‌تا من د ساله‌كێ دا كری ل 17 سالێن پێشتر نه‌هاتییه كرن.
سه‌رۆكوه‌زیرێن ئیراقێ ل دۆر داعشێ ژی خویا كر، وان سه‌ركه‌فتن د كوشتنا والیێ داعشێ و جێگری وی دا ئینایه، هه‌ر ل دۆر هێرشێن بالیۆزخانه‌یان ژی گۆت: وان ب سه‌دان كه‌‌س ده‌سته‌سه‌ركرینه یێن كو ل دژی قانوونێ كاردكرن و وه‌لاتیێن سڤیل كرینه ئارمانج.
