مه‌حموود محه‌مه‌د: پارتى دێ ب سه‌ربلندى ڤه‌گه‌ریته‌ كه‌ركووكێ

ئه‌ندامێ مه‌كته‌با سیاسى یا پارتییا دیمۆكراتا كوردستانێ راگه‌هاند، پارتى دێ ڤه‌گه‌ریته‌ كه‌ركووكێ لێ دڤێت ڤه‌گه‌ریانه‌كا ب سه‌ربلندى بیت و پارتى دخوازیت هه‌موو كێشه‌یان د چارچووڤێ ده‌ستوورى دا چاره‌ بكه‌ت.

مه‌حموود محه‌مه‌د، به‌رپرسێ ده‌زگه‌هێ ره‌وشه‌نبیرى و راگه‌هاندنا پارتى بۆ خانى نیوز راگه‌هاند، كێشا كه‌ركووكێ به‌رده‌وامه‌ و ئه‌و كێشه‌ به‌رى سه‌رهلدانێ و د هه‌موو قۆناغان دا هه‌بوویه‌.

مه‌حموود محه‌مه‌د گۆت ژى: حكومه‌تێن ئێك ل دووڤ ئێك یێن ئیراقێ ل شوونا چاره‌كرنا كێشا كه‌ركووكێ، ئه‌و كێشه‌ ئالۆزتر و مه‌زنتر لێكرییه‌.

به‌رپرسێ ده‌زگه‌هێ ره‌وشه‌نبیرى و راگه‌هاندنا پارتى راگه‌هاند، پارتى كار دكه‌ت له‌ورا ره‌خنه‌ لێ دهێنه‌ گرتن و هنده‌ك ئالییان ژى چاڤ ب وى كارى نارابن.

مه‌حموود محه‌مه‌د، گۆت ژى: كۆمه‌كا حزبان ل كوردستانێ هه‌یه‌ و هه‌موو ژى هه‌ڤڕكێن ئێكن، لێ مخابن پرسا هه‌ڤركێ و دژومناتیێ ل نك هنده‌ك حزبێن سیاسى تێكهه‌ل بوویه‌، ل شوونا هه‌ڤڕكیێ ل سه‌ر به‌رنامه‌ و پرۆژێن باش بكه‌ن، هه‌موو هزرێن وان بووینه‌ ئه‌و دێ چاوا دژاتییا ئالییه‌كێ دى بكه‌ن.

ل دۆر شه‌ر و په‌ڤچوونێن په‌كه‌كێ و سوپایێ توركیا مه‌حموود محه‌مه‌د، به‌رپرسێ ده‌زگه‌هێ ره‌وشه‌نبیرى و راگه‌هاندنا پارتى بۆ خانى نیوز راگه‌هاند، هه‌لویستى پارتى رۆهن و ئاشكرایه‌ و پارتى دخوازیت په‌كه‌كه‌ و توركیا شه‌رێ خوه‌ ژ توركیا نه‌ڤه‌گوهێزنه‌ ناڤا هه‌رێما كوردستانێ.

مه‌حموود محه‌مه‌د، ئاشكرا ژى كر، شه‌رێ په‌كه‌كێ و توركیا زیانه‌كا ئێكجار مه‌زن ژ روویێ ئابوورى و جڤاكى و ده‌روونى گه‌هانیه‌ هه‌رێما كوردستانێ.

مه‌حموود محه‌مه‌د ل دۆر ده‌ستوورێ هه‌رێمێ ژى گۆت: هه‌رێما كوردستانێ پێدڤى ب ده‌ستوورى هه‌یه‌ و ئه‌و یه‌ك د ده‌ستوورێ ئیراقێ دا رێ پێ هاتیه‌ دان.

گۆت ژى: سه‌رۆكاتییا هه‌رێمێ و سه‌رۆكاتییا حكومه‌تێ و سه‌ركردایه‌تییا پارتى كار ل سه‌ر وێ یه‌كێ دكه‌ن كو ده‌ستوور بهێته‌ نڤیسن.