واشنتۆن پۆست: هێرشا سه‌ر فرۆكخانا هه‌ولێرێ ب درۆنا ئیرانى هاتییه‌كرن

ل گۆره‌ى ئه‌نجامێن ده‌ستپێكى یێن لێكۆلینا ل سه‌ر هێرشا ڤان داوییان ل سه‌ر فرۆكخانا هه‌ولێرێ هاتییه‌كرن، دیاربوویه‌ ئه‌و هێرش ب درۆنا ئیرانى هاتییه‌كرن.

رۆژناما واشنتۆن پۆست یا ئه‌مریكى ئاشكرا كر، ئه‌و هێرشا گرۆپێن چه‌كدار یێن ئیراقێ ل مه‌ها نیسانا ئه‌ڤساله‌ كرییه‌ سه‌ر فرۆكخانا هه‌ولێرێ، ب رێیا فرۆكێن بێ فرۆكه‌ڤان یێن ئیرانى هاتییه‌كرن.

ئاماژه‌ ب وی یه‌كێ ژى كر، قه‌بارێ وان درۆنا یێ بچیك بوو و د ئاسته‌كێ نزم دا فرینه‌ كو سیسته‌مێ به‌رگرییا ئه‌سمانى یا هێزێن ئه‌مریكا نه‌شیایه‌ بۆ ده‌مه‌كێ درێژ چاڤدێرییا وان بكه‌ن و رێگرییێ لێ بكه‌ن.

رۆژنامێ ژ زارێ هه‌ژماره‌كا به‌رپرسێن ئه‌مریكى دیاركرییه‌، ناڤه‌نده‌كا هه‌والگیرییا ئه‌مریكى سى ئاى ئه‌ى د ناڤا فرۆكخانا هه‌ولێرێ دا بوویه‌ و وان هێرشان و دلگرانییه‌كا مه‌زن بۆ ئه‌مریكا دروستكرییه‌.

واشنتۆن پۆست دیار ژى كر، هه‌ژماره‌كا به‌رپرسێن ئه‌مریكى كۆ برێت مه‌كگۆرك ژى دناڤا وان دایه‌ پێشنیازا به‌رسڤدانا سه‌ربازى یا ئیرانێ بۆ جۆ بایدنى كرییه‌، لێ سه‌رۆكێ ئه‌مریكا ئه‌و پیشنیازه‌ ره‌تكرییه‌.

ل مه‌ها نیسانا ئه‌ڤساله‌ هێرشه‌ك ژلایێ چه‌ند فرۆكێن بێ فرۆكه‌ڤان ل سه‌ر فرۆكخانا هه‌ولێرێ هاته‌كرن و پاشان گرۆپێ چه‌كدارێن سه‌رایا ئه‌ولیاء ئه‌لده‌م به‌رپرسیاره‌تییا خوه‌ ژ وی هێرشێ راگه‌هاند و دیاركر، وێ هێرشێ بنگه‌هێ مووسادێ ل هه‌ولێرێ كرییه‌ ئارمانج، لێ ب گۆتنا واشنتۆن پۆست وێ هیرشێ ناڤه‌نده‌كا تایبه‌ت یا سى ئاى ئه‌ى كرییه‌ ئارمانج.