خانى نیوز: مه‌تین عومه‌ر:
نۆژداره‌كێ تایبه‌تمه‌ند یێ زارۆیان راگه‌هاند؛ ده‌مێ چه‌ند رۆژایه ڤایرۆسه‌ك دناڤا زارۆكان دا به‌لاڤبوویه.
ئازاد عه‌بدولجه‌بار، نۆژدارێ تایبه‌تمه‌ند یێ زارۆكان بۆ خانى نیوز راگه‌هاند؛ جۆرێ ڤایرۆسێ به‌لاڤبووى هه‌ودانا ده‌ڤ و ده‌ست و پێیا یه و ڤایرۆسه‌كێ كه‌ڤنه و هه‌ر سال جاره‌كێ یان دو جاران به‌لاڤ دبیت دناڤ وان زارۆیان دا یێن ژیێ وان ژ 10 سالییێ كێمتر.
گۆت ژى: ژ نیشانێن وى ڤایرۆسى یێن دیار په‌یدابوونا تایێن بهێزه ل ده‌ڤ زارۆی ل ده‌مێ دو تا سێ رۆژێن ده‌سپێكێ و ددوڤدا پرسك ل ناڤ ده‌ڤێ وان دهێن و پترییا جاران ئه‌و پرسك ل پشتا ده‌ڤێ زارۆیان دهێن و ددوڤدا ده‌ست و پێیا ڤه‌دگریت.
دیار ژى كر، ئه‌و ڤایرۆسه كچ و كۆران دگریت و دیارترین سه‌رباركێن وێ ئه‌وه زارۆ نه‌شێت خوارنێ بخۆت، لێ پێدڤى یه خوارن و ڤه‌خوارنێن ته‌زى ب زارۆكى بهێنه‌دان.
دكتۆر ئازاد عه‌بدولجه‌بار دیار ژى كر، ئه‌و ڤایرۆس یێ ب مه‌ترسى نینه ب تنێ بۆ وان نه‌خوشان یێن نه‌خوشییێن دى هه‌بن، و ب رێیا كۆخكێ و ده‌ردانێن ده‌ڤى دهێته ڤه‌گۆهاستن له‌وما پێدڤى یه زارۆك تێكه‌لییا چ زارۆیێن دى نه‌كه‌ت و ده‌ستكارییا چ تشتان نه‌كه‌ت.
