مه‌سرور بارزانى پێشوازى ل هنارتیێ شیره‌تكارێ ئێكه‌تیا ئورۆپا ل ئێراقێ كر

مه‌سرور بارزانى سه‌رۆكێ حكومه‌تا هه‌رێما كوردستانێ ئه‌ڤرۆ چارشه‌مبى 30-6-2021 پێشوازى ل كریستۆف بویك سه‌رۆكێ هنارتیێ شیره‌تكارێ ئوروپا ل ئێراقێ كر.

سه‌رۆكێ هنارتیێ شیره‌تكارێ ئێكه‌تیا ئورۆپا ل ئێراقێ ، تیشك خسته‌ سه‌ر ئه‌ركێن هنارتى كو ل سالا 2017 ل ئێراقێ بۆ پێشكێشكرنا هاریكاریێن شیره‌تكاریێ د وارێ ئه‌منى و ئه‌نجامدانا چاكسازیان ل هێزێن ناڤخوه‌ دا.

د وێ كۆمبوونێدا گوتوبێژ ده‌رباره‌ى گه‌شه‌پێدانا هه‌ماهه‌نگیێ ل ناڤا داموده‌زگه‌هێن په‌یوه‌ندیداریێن حكومه‌تا هه‌رێما كوردستانێ و هنارتیێ شیره‌تكارێ ئێكه‌تیا ئورۆپا ل ئێراقێ هاته‌ كرن، ب تایبه‌تى د وارێ راهێنان و هاریكاریكرنا پۆلیس و ده‌زگه‌هێن ئه‌منى یێن هه‌رێما كوردستانێ د رووبرووبوونا تاوانێن رێكخراوێن تیرۆرى دا.

هه‌روه‌سا ئاماژه‌ ب گرنگیا پێشئێخستنا ستراتیژیا ئه‌منى كر د به‌رهنگاربونا توندوتیژیێ و رێگریكرن ل توندره‌ویێ.

سه‌رۆكێ حكومه‌تێ ئاماده‌یا داموده‌زگه‌هێن په‌یوه‌ندیدارێن حكومه‌تا هه‌رێما كوردستانێ بۆ هه‌ر هه‌ماهه‌نگیه‌كا پێدڤی دگه‌ل هنارتیێ شیره‌تكارێ ئێكه‌تیا ئورۆپا ل ئێراقێ ده‌ربرى و هیڤیا سه‌ركه‌فتنێ بۆ خواست د ئه‌ركێن وى دا.