ب خه‌م و كۆڤانه‌كا مه‌زن ڤه خه‌به‌رێ مالئاڤاهیا رۆژنامه‌ڤان و ره‌وشه‌نبیر ئیسماعیل تاهر جانگیر سكرتێرێ به‌رێ یێ لقێ دهۆك یێ سه‌ندیكا رۆژنامه‌نڤیسێن كوردستانێ گه‌هشته مه.
ئیسماعیل تاهر جانگیر ل سالا 1969 ل باژێرێ دهۆكێ هاتییه سه‌ر دونیایێ، ل سالا 1992 به‌كالوریۆس ب زمانێ عه‌ره‌بى ل زانكۆیا به‌غدا وه‌رگرتییه، ل ده‌ستپێكا ژیانا خوه یا رۆژنامه‌ڤانى ل سالا 1993 وه‌ك نڤیسه‌رێ ده‌نگ وباسان ل رادیۆیا دهۆك كار كرییه و ل سالا 1998 وه‌كو نڤیسه‌ر ل تەلەڤزیۆنا دهۆك كار كرییه و پاشى وه‌كو پێشكێشكار ل تەلەڤزیۆن و رادیۆیا دهۆك به‌رده‌وام بوویه هه‌تا رۆژا وه‌غه‌رێ، دیسان ل چه‌ندین ده‌زگه‌هێن میدیایى وه‌ك تەله‌ڤزیۆن و رۆژنامێن كوردستانى وعه‌ره‌بى وه‌كو نڤیسه‌ر و په‌یامنێر و پێشكێشكار كار كرییه، رۆژنامه‌ڤان ئیسماعیل تاهر جانگیر د ژیانا خوه دا 8 په‌رتووك د وارێن جۆدا دا چاپكرینه و11 به‌هه‌مێن دى ل به‌رده‌ست بوون بۆ چاپێ، زێده‌بارى چه‌ندین به‌رهه‌مێن نڤێسینێ ژ گۆتاران ب زمانێن كوردى و عه‌ره‌بى د وارێ ره‌وشه‌نبیرى و رۆژنامه‌ڤانى دا به‌لاڤ كرینه، ژبه‌ر رۆلێ وى یێ به‌رچاڤ د وارێ رۆژنامه‌گه‌ریێ دا دهێته هه‌لبژارتن وه‌كو سكرتێرێ لقێ دهۆك یێ سه‌ندیكا رۆژنامه‌نڤیسێن كوردستانێ ل سالا 2008 هه‌تا 2012، ل سالا 2007 خه‌لاتێ حافز قازى یێ میدیایى بده‌ستڤه ئینایە، دیسان ل سالا 2015 خه‌لاتێ زێرى یێ سه‌ندیكا رۆژنامه‌نڤیسێن كوردستانێ ژ به‌ر رۆلێ وى یێ كاریگه‌ر د ڤى وارى دا وه‌ردگریت و هه‌ر د وێ سالێ دا دبیته رێڤه‌به‌رێ په‌رتۆكخانا به‌درخانیان ل دهۆكێ.
ب هه‌لكه‌فتا وه‌غه‌ركرنا ره‌وشه‌نبیر و رۆژنامه‌ڤان و هه‌ڤكارێ مه ئیسماعیل تاهر جانگیر ب ناڤێ ناڤه‌ندا خانى یا ره‌وشه‌نبیرى و راگه‌هاندنێ سه‌ره‌خوشیێن خوه دگه‌هینینه هه‌موو میدیاكار و ره‌وشه‌نبیر و نڤیسه‌ر كادر وئ ه‌ندامێن ناڤه‌ندا خانى و كه‌س وكارێن خودێ ژێ رازى، وه‌غه‌ركرنا هه‌ڤكارێ مه ئیسماعیل تاهر جانگیری ڤالاهییه‌كا مه‌زن ئێخسته وارێ راگه‌هاندن و ره‌وشه‌نبیریا كوردستانێ دا و ب تایبه‌تی ل پارێزگه‌ها دهۆكێ.
انا لله وانا الیه راجعون
ناڤه‌ندا خانى یا ره‌وشه‌نبیرى و راگه‌هاندنێ
13/7/2021
