نێچیرڤان بارزانى، سەرۆکێ هەرێما کوردستانێ، نیڤرۆیا ئه‌ڤرۆ ئێكشه‌مبى 2021/7/18 پێشوازى ل كاردینال لویس ساكۆ پاتریاركی كەنیسەیا كلدانی ل عێراقێ و جیهانێ و شاندێ دگه‌لدا كر .
د دیداره‌کێدا ره‌وشا پێکهاتەیا کلدان و مەسیحیێن عیراقێ و هەرێما کوردستانێ ب گشتى و ڕەوشا ئاوارێن مەسیحییان ل هەرێما کوردستانێ گۆتوبێژ كر، هەروەسا تیشک خستە سەر ره‌وشا دەشتا نەینەوا و مەسیحیێن مووسڵ و ده‌ڤه‌رێ.
هەردوولا د هه‌ڤڕا بوون کو پشت راستیێ د ده‌ینه ئاوارەیێن مەسیحی، كو بڤه‌گه‌رنه ڤه جهێن خوه و ده‌ست ب ئاڤه‌دانكرنێ و ڤه‌گه‌راندنا ژیانێ بۆ ده‌ڤه‌رێن خوه بكه‌ن كو ژ ئه‌نجامێ هێرشێن داعشێ زیانێن زۆر ڤێكه‌فتینه و پێدڤى ب هاریكارییا ناڤده‌وله‌تى هه‌نه.
كاردینال ساكۆ ستایشىا پێكڤه ژیانێ، ئێكقه‌بوولكرنێ، لێبورینێ و پێشكه‌فتن و رولێ سه‌ركردایه‌تیێ ل هه‌رێما كوردستانێ كر و دووپاتى كره‌ڤه كو كوردستانى بوونا ناسنامه‌یه‌كێ كۆمڤه‌كرنا هه‌موو پێكهاته‌یێن ئاینى و نه‌ته‌وه‌ی و ئاواره‌ێن مه‌سیحى ل وه‌لاتێن جیهانێ دشێن بڤه‌گه‌رنه ڤه هه‌تاكو ب ئارامى و پشت راستى ل كوردستانێ بژین و د هه‌ڤپشك بن د پێشخستن و ئاڤه‌دانكرنێ دا.
ژلایێ خوه ڤه سەرۆک نێچیرڤان بارزانى دووپاتى كره‌ڤه كو هه‌رێما كوردستانێ شانازیێ ب كولتوورێ پێكڤه ژیانێ و لێبورینێ دكه‌ت، هه‌ردوو لایه‌نان ژى به‌حسێ سه‌ره‌دانا پاپایێ ڤاتیكانێ بۆ عێراقێ و هه‌رێما كوردستانێ ب گرنگ ل قه‌له‌م دا.
هه‌لبژارتنێن داهاتى یێن عێراقێ و چه‌ند پرسه‌كێن دى یێن تایبه‌ت ب كاروبارێن كه‌نیسێ و مه‌سیحییان ل عێراقێ و هه‌رێما كوردستانێ ته‌وه‌ره‌كێ دیێ دیدارێ بوون.
