ژ ئەنجامێ بوردۆمانێن توركییا 40 جاران کارەبا ڤێ ناحییێ ژ کار کەفتییە

رێڤەبەرێ کارەبا قەزا ئامێدیێ بۆ ئاژانسا خانی دیار کر: ژ ئەنجامێ بوردۆمانا فرۆکە و تۆپێن تورکیا نێزیکی 40 جاران کارەبا ناحییا  کانی ماسێ ژ کارکه‌فتییە.

ئەندازیار ئارام جەلال” گۆت ژی: هه‌ر ژ ده‌مێ هێرشا سوپایێ تورکی بۆ سەر دەڤەرێن سنوری یێن قەزا ئامێدیێ ل دەسپێکا سالا بوری هه‌تا نوکە چەندین جاران کارەبا گوندێن سنورێ ناحییا کانی ماسێ کەفتینە بەر هێرشا لەشکەرێ تورکیا و ژ کار کەفتییە .

ناڤهاتی ئاشكرا كر ژی: به‌هرا پتر ئەڤ ژ کار کەفتنە د کەڤیتە سەر هێلا سەرەکی یا ١١ کەیڤی و کارەب ل سەرانسەری دەڤەرێ دهێته‌ برین و تیمێن وان و ب تایبەت یێن کانی ماسێ خه‌مساری نەکرییە و پرانیا وان ژ کار كه‌فتنا د رۆژێ دا یان ژی رۆژا پاشتر هاتینە چارەسەر کرن و کارەب بۆ دەڤەرێ ڤەگەراندییە

رێڤەبەرێ کارەبا قەزا ئامێدیێ گۆت ژی، داوی جار بەری دو رۆژان جارەکا دی کارەبا گوندێ هرۆرێ کەفتییە بەر بوردۆمانێ و ژ کار کەفتبوو” لێ ب خۆشحالی ڤە جارەکا دی ژ لایێ تیمێن سەخبێریا کارەبێ هاتییە چارەسەر کرن.