سەرۆك بارزانی ب هەلکەفتا جەژنا سەرێ ساڵا ئاینێ ئێزیدییان په‌یامه‌كا پیرۆزباهییێ راستی ته‌ڤایا خوشك و برایێن ئۆلا ئێزدییان كر.
ده‌قێ په‌یاما سه‌رۆك بارزانی
ب ناڤێ خودێ مەزن و دلۆڤان
ب هەلکەفتا هاتنا جەژنا سەرێ سالا ئولا ئێزیدییان، چارشەمبیا سور گەرمترین پیرۆزباهیێن خۆ ئاراستەیی هەمی خوشك و برایێن ئێزیدی ل كوردستانێ و جیهانێ دكەم و هیڤییا بەختەوەری و کەیفخۆشیێ بۆ وان دخوازم.
خوشك و برایێن ئێزیدی بەشەکێ رەسەنێ گەلێ كوردستانێ نە و د ڤێ هەلکەفتێ دا دووپات دکەم کو ل گەل ئێش و ئازارێن وان داینە و ب هەمی شیانان پشتەڤانیا داخوازیێن خوشک و برایێن ئێزیدی دكەم.
هیڤیدارم خوشك و برایێن ئێزیدی ب سەربەستی و ئازادی بزڤرنە ل سەر جھـ و وارێ خوە و دووماهی ب ئاوارەیی و ئەو نەهامەتیا كو ژلایێ تیرۆرست و نەحەزێن گەلێ مە ب سەر وان دا سەپاندین بھێت و بۆ ڤێ چەندێ پێدڤییە هەمی لایەك هەڤكار بن کوردێن ئێزدی ب خۆ بڕیارێ ل سەر چارەنڤیس و پاشەرۆژا خۆ بدەن و برینێن وان ساڕێژ بكەن.
كوردستان وەڵاتێ پێكڤەژیانێ یە و پێدڤییە ئەڤ فەرهەنگا دەوڵەمەند بھێتە پاراستن.
هیڤیدارم هەمی جەژن و هەلکەفتێن هەوە ب شادی و ئارامی دەرباز ببن و بمینن ب خێر و خۆشی.
مه‌سعود بارزانی
19 ی نیسانا 2022
