بریاره‌ك ل دۆر جزایێن ترومبێلان هاته‌ ده‌ركرن

ل دۆڤ رێڤه‌به‌رییا هاتن و چوونا هه‌رێما كوردستانێ، ئه‌و شوفێرێن پتر ژ 250 هزار دیناران هاتینه‌ جزادان، دشێن وى كوژمه‌ى بشێوه‌یێ قست بده‌ن، و دئازادن بۆ هه‌ر مه‌هه‌كێ چه‌ند پاره‌یى بده‌ن.

دشیاندایه‌ جزا ب ئێكجار بهێته‌ دان یانژى ببیته‌ قستێ مه‌هانه‌، لێ ئه‌و شوفێرێ حه‌زدكه‌ت جزایێ خوه‌ بشێوه‌یێ قست بده‌ت، پێدڤییه‌ ترۆمبێل ل سه‌ر ناڤێ وى بخوه‌ هاتبیته‌ تۆماركرن، یانژى بریكارنامه‌ بۆ هاتبیته‌ درووستكرن، و سۆزنامه‌یه‌كێ ژ به‌شێ یاسایى یێ هاتن و چوونێ پر بكه‌ت كو دماوه‌یێ ئێك سال دا هه‌موو جزایێ خوه‌ بده‌ت، ژبه‌ركو ده‌م بۆ ناهێته‌ درێژكرن و ئه‌گه‌ر پێگیرى ب سۆزنامه‌یا خوه‌ نه‌كر بۆ هه‌ر جزایه‌كى ئه‌و دێ یێ به‌رپرسیار بیت.

هه‌روه‌سا سالنامه‌یا ترۆمبێلێ ناهێته‌ نووكرن هه‌تا هه‌موو قستێن خوه‌ بده‌ت، و نووكرن ژى بتنێ دێ بۆ ده‌مێ ئێك سال بیت هه‌تا قستێن وى تما دبن، ئه‌ڤ پێشنیازه‌ هه‌موو جورێن جزادانێ وه‌كو سه‌رپێچییێن كامیران و نه‌گرێدانا قایشا سلامه‌تییێ و ب كارئینانا تله‌فونێ ل ده‌مێ هاژوتنا ترۆمبێلێ و راوه‌ستییان ل جهێن قه‌ده‌غه‌كرى و هه‌موو سه‌رپێچییێن دى بخوه‌ڤه‌ دگریت.