مه‌سرور بارزانى: پێدڤییه‌ چاره‌سه‌رییه‌كا هه‌ڤپشك و ئاشتییانه‌ بۆ كێشه‌یا خوارنێ بهێته‌ دیتن

ئه‌ڤرۆ سێشه‌مبى 24ى گۆلانا 2022ێ سه‌رۆكێ حكومه‌تا هه‌رێما كوردستانێ مه‌سرور بارزانى، ل كۆربه‌ندێ ئابوورى یێ داڤۆس ل سویسرا، پشكدارى دپه‌نه‌له‌كیدا بناڤێ ( پێكهاته‌یا نوو یا ئاسایشێ ل رۆژهه‌لاتا ناڤین ) كر و به‌حسا ئاسایشا خوارنێ ل رۆژهه‌لاتا ناڤین كر.

سه‌رۆكێ حكومه‌تا هه‌رێمێ دیاركر، باشترین رێك بۆ ئاسایشا رۆژهه‌لاتا ناڤین ئه‌وه‌ كو چاره‌سه‌رییه‌كا هه‌ڤپشك ب شێوه‌یه‌كێ ئاشتییانه‌ بۆ كێشه‌یا كێمییا خوارنێ بهێته‌ دیتن كو نها بوویه‌ كێشه‌یا سه‌ره‌كى.

ده‌قێ ئاخڤتنێن مه‌سرور بارزانى د په‌نه‌لیدا.

ئه‌ز وه‌سا دبینم كێشه‌ ل ئێك جهـ نا راوه‌ستن و دچنه‌ هنده‌ك جهێن دى، كاریگه‌رییا شه‌رێ ئوكرانیا كاریگه‌رییه‌ لسه‌ر هه‌موو جیهانێ، نابیت ئه‌ڤ كێشه‌یه‌ ب پشتگوهـ خستنا هنده‌ك كێشه‌یێن دى بهێته‌ چاره‌سه‌ركرن، كێشه‌یا ئاسایشا خوارنێ ده‌ركه‌ڤتییه‌ و باشترین رێك بۆ به‌رهنگاربوونا ڤێ كێشه‌یێ ئه‌وه،‌ كو چاره‌سه‌رییه‌كا هه‌ڤپشك ب شێوه‌یه‌كێ ئاشتییانه‌ بهێته‌ دیتن ژبه‌ركو نها ئه‌و كێشه‌یا سه‌ره‌كییه‌.