عەلی حەفزوللا
نابێژین رۆژ بەلێ گەلەک ب زەحمەتە حەفتییەک ب بوریت ئەگەر کار بدەستەک، خودان پۆست و پلەیەک ب لێدوانەکا سەیر و سەمەر خوە نەکەتە قاچکێ دەڤێ خەلکی، ئەڤجا پەسن و شانازی بیت، یان مەلاقی بۆ سەرکردەک و پلە بلندەکی بیت، یان خوە دیارکرن و ئینانەپێش و نمایشکرن بیت، یان پنیکرنەکا بێ مفا بیت یان….هتد، کو دبیت عەفەوی بیت، یان ب دیراسە و مەرەم بیت!.. یان ب سفکاتی تەماشەکرنا مێشک و بیردانکا خەلکی بیت!.. لێ یا مسوگەر ئەو هەردەم ب سەرێ وی/وێ بخوەدا دشکێت و هەر تشت ئاشکرادبیت ژ زانین، شارەزایی و شیانان، ئەڤجا سەبارەت وی بابەتی بیت یان هزرکرنا وی/وێ یا گەلەک سادە بو خەلکی.
هزر دکەى خەلکەک هێشتا ئەو خەلکێ سادەیێ چەرخێ بورییە!!.. هێژا.. چەندێ بۆ خوە ددانی ئەگەر پترێ نەدانی هەما تەمەت وێ بۆ خەلکی ژی دانە، ئەو دونیایا تو تێدا دژی ئەوژی لێ دژین، یان هەما ژبەرکو گەهشتییە پۆستەکی ب هەر رەنگێ هەیی و قات و ریباتێن تە.. یان میکیاژ و سالۆنا تە ب چەندین وەرەقانە ئەڤجا خلاس کەسێ زانین و شارەزایا تە ڤێ نینە؟!.. چ بێژی راست و دروستە و هەمی دێ باوەرکەن؟… هشیاربە ژ وێ خەوێ ئێدی نەما ئەو رۆژ.. ئێدی نەزان نەمان و هەر ئێکی ئامیرەکێ زیرەک د دەستاندایە ژ تە زویتر راستیا هەر تشتی دزانیت، نوکە چ درەو زێدەتری چەند چرکەیان ناڤەکێشن تا راستی ئاشکرادبیت، بەلکو هێشتا تە گوتنا خوە تەمام نەکری هەمی راستیا وێ دزانن.
مانە بەسن لێدوانێن عنتیکە، تنێ جارەکێ سەحکە کومێنتێن خەلکی، لێ خوە ب یێن دەردور و مەلاقان نەخاپینە.. پێدڤی وێ ژی ناکەت.. هەما ژخوە ب پرسە ئەرێ تە بخو ١% ژی باوەری پێ هەیە؟!!..
تە دڤێت باوەرکە و تە دڤێت قەت باورنەکە.. لێ گەرەنتی بو تە ل وی دەمێ تو هزردکەی تو یێ/یا ترانا ب مێشک و هزرێن خەلکی دکەی ١٠٠% بەروڤاژیە و ئەو یاری وترانەیان ب هزرکرن و گوتنا تە دکەن!..
