سوبەهی لژنا دەستپاکییێ دێ دووڤچوونا کۆمکرنا داھاتی کەت

ئاژانسا خانی ، تایبەت:

گومان د کۆمکرنا داھاتێ پارێزگەھا سلێمانییێ ھەیە و ب فەرمانا سەرۆکێ حکومەتا ھەرێما کوردستانێ لایەنێن پەیوەندیدار ھاتینە راسپاردن بۆ ئاشکراکرنا شێوازێ کۆمکرنا داھاتی، ئەندامەکا لژنا دەستپاکییێ ل پەرلەمانێ کوردستان گوت، سوبەھی چارشەمبی، دێ لژنا دەستپاکییێ سەرەدانا سلێمانییێ کەت بۆ دووڤچوونا کۆمکرنا داھاتی.

لەیلا عەبدولجەبار ئەنداما لژنا دەستپاکییێ بۆ ئاژانسا خانی دیار کر” لژنا دەستپاکییێ ل پەرلەمانێ کوردستانێ دووڤچوونا پرسا کۆمکرنا داھاتێ ناڤخۆ دکەت و حەفتیا بوری لژنێ دەست ب سەرەدانانێن خۆ کرییە بۆ بانکێن پەیوەندیدار ب کۆمکرنا داھاتی، بڕیارە سوبەھی چارشەمبی شاندەکێ لژنا دەستپاکییێ سەرەدانا پارێزگەھا سلێمانییێ بکەت و ل گەل بانکا ھەرێمێ ل سلێمانییێ دووڤچوونا کۆمکرنا داھاتی بھێتە کرن، ھەتا بزانین چاوا داھات دھێتە کۆمکرن و پشتەڤانیا بەلاڤکرنا مووچەی دھێتەکرن.

لەیلا عەبدولجەبار گۆت ژی” پشتی بڕیارا سەرۆکی حکومەتا ھەرێما کوردستانێ پەرلەمان ژی ب ئەرکێ خۆ رابوویە بۆ دووڤچوونا کۆمکرنا داھاتی و پشتی سەرەدانێن لژنا دووماھی دھێت، دێ ئەنجام ھێنە راگەھاندن، شێوازێ کۆمکرنا داھاتی دێ ھێتە دیارکرن، چونکی پێدڤییە داھاتێ ناڤخۆ وەک خۆ بھێتە کۆمکرن و بۆ بەلاڤکرنا مووچێ فەرمانبەران بھێتە بکارئینان.