ئه‌ڤرۆ ئێكشه‌مبى 19ى خزیرانا 2022ێ سه‌رۆكێ حكومه‌تا هه‌رێما كوردستانێ مه‌سرور بارزانى پێشوزانى ل شانده‌كێ بلندێ سه‌ربازى و ئێمناهییا عیراقێ ب سه‌رۆكاتییا سه‌رۆك ئه‌ركانێن له‌شكه‌رێ عیراقێ جه‌نه‌رال عه‌بدولئه‌میر یاره‌للا كر.
سه‌رۆكێ حكومه‌تێ دووپاتى ل گرنگییا پێشڤه‌برنا هه‌ماهه‌نگییا دناڤبه‌را پێشمه‌رگه‌ى و له‌شكه‌رێ عیراقێ دا ب تایبه‌تى ل ده‌ڤه‌رێن مادده‌یێ 140 بۆ رووبرووبوونا تیرۆرێ كر.
دكۆمبوونێ دا مه‌سرور بارزانى دووپاتكر، دڤێت پێشمه‌رگه وه‌كو به‌شه‌ك ژ سیسته‌مێ ئێمناهییا عیراقێ بهێته دیتن و پشته‌ڤانی لێ بهێته‌كرن، ژبه‌ركو ب هێزبوونا پێشمه‌رگه‌ى دبه‌رژه‌وه‌ندییا سه‌قامگێرییا ره‌وشا ئه‌منى یا عیراقێ ب گشتى دایه، پێدڤییه له‌شكه‌رێ عیراقێ ژى نوونه‌راتییا هه‌موو پێكهاتێن عیراقێ بكه‌ت و بێى جوداهى پارێزگارییێ لێ بكه‌ت.
شاندێ بلندێ له‌شكه‌رى و ئێمناهییا عیراقێ كورتییه‌ك ل دۆر ره‌وشا ئێمناهى و له‌شكه‌رى یا عیراقێ دیاركر، و ئاماژه دا هندێ كو ئارمانجا ڤێ سه‌ره‌دانێ پێشڤه‌برن و ب هێزكرنا هه‌ماهه‌نگی و هاریكارییێن دناڤبه‌را له‌شكه‌رێ عیراقێ و پێشمه‌رگه‌ى دایه.
