ئه‌ڤرۆ سه‌رۆكێ هه‌رێما كوردستانێ نێچیرڤان بارزانى پێشوازى ل كومه‌كا نڤیسه‌ر و ئه‌كادیمى و ره‌وشه‌نبیرێن كوردستانا ئیرانێ كر كو بۆ پشكداریكرنێ درێوره‌سمێن دوهى یێن دانه‌نیاسینا زنجیره پرتووكه‌كا به‌لگه‌نامه‌یی دا سه‌باره‌ت شوره‌شێن بارزان سه‌ره‌دانا هه‌رێما كوردستانێ كربوو.
د دیداره‌كێ دا سه‌روكێ هه‌رێما كوردستانێ بخێرهاتنا گه‌رم یا شاندى كر و دووپاتى لسه‌ر پێشڤه‌برنا په‌یوه‌ندییێن هه‌رێما كوردستانێ و كومارا ئیسلامى یا ئیرانێ ژلایێ كلتور و ره‌وشه‌نبیریڤه كر، هیڤی خواستن پرا په‌یوه‌ندیێن فه‌رهه‌نگى یێن دناڤبه‌را هه‌ردو گه‌ل و وه‌لاتێن دوست و جیران دا بهێزتر لێ بهێت.
هه‌ر د دیدارێ دا نڤیسین و ئه‌ده‌بیاتێن كوردى و بزاڤا چاپ و به‌لاڤكرنا كوردى ل هه‌رێما كوردستانێ و ئیرانێ و چه‌ند بابه‌تێن پێدڤى دڤى بیاڤى دا گه‌نگه‌شه كرن و بیروبۆچوون لێكگوهارتن، هه‌روه‌سا رۆناهى به‌ردا سه‌ر بزاڤا كۆمكرنا به‌لگه‌نامێن گرێدایى دیرۆكا كوردستانێ و شوره‌شێن وێ ل ئه‌رشیفێن وه‌لاتێن جیران و جیهانێ و دڤى بیاڤى دا كار و ماندیبوونا ئه‌نستیتیۆتا كوردستانێ ل ته‌هران و بارامى وه‌له‌دبه‌گى و هه‌ڤكارێن وى بۆ كۆمكرنا به‌لگه‌نامان و چابكرنا وان بلند هاته نرخاندن.
شاندێ مێهڤان په‌سنا ره‌وانگه‌ها ئاشتیخوازانه و بزاڤێن سیاسی و دبلوماسییێن سه‌روكێ هه‌رێما كوردستانێ ل سه‌ر ئاستێن ناڤخوه یێن كوردستانێ و عیراقێ و ده‌ڤه‌رێ كر و هیڤییا سه‌ركه‌ڤتنێ بۆ خواست.
