ل ده‌ستپێكا كۆمبوونێ، سه‌رۆكێ حكومه‌تێ ئاماژه دا كو مه‌ره‌م ژڤێ كۆمبوونێ ئه‌وه دانوستاندنه‌كا ئاشكرا دگه‌ل راگه‌هاندنێ بكه‌ن و ب رێكا وێ دگه‌ل خه‌لكێ كوردستانێ بگه‌هنه روونكرن و زانیارییان ده‌رباره‌ی چه‌ند بابه‌تێن گرنگ.
سه‌رۆكێ حكومه‌تێ داخواز ژ ده‌زگه‌هێن راگه‌هاندنێ كر هاریكارییا حكومه‌تێ بۆ سه‌رخستنا پرۆسه‌یا چاكسازییێ و رووبرووبوونا گه‌نده‌لییێ بكه‌ن، و ئاماژه دا هندێ كو راگه‌هاندن ئه‌ركه‌كێ پیرۆزه و گرنگییه‌كا مه‌زن هه‌یه و پێدڤییه ب به‌رپرسیاری ئه‌ركێن خوه بجهبینن.
سه‌رۆكێ حكومه‌تێ دووپاتی ل وێ چه‌ندێ ژی كر، حكومه‌تا هه‌رێما كوردستانێ پشته‌ڤانییا ئازادییا راگه‌هاندن و راده‌ربرین و ره‌خنه‌گرتنێ بۆ چاكسازی و باشتركرن و پێشڤه‌برنا ره‌وشا كوردستانێ دكه‌ت، لێ دهه‌مان ده‌م دا پێدڤییه راگه‌هاندن داكوكییێ ل بابه‌تێن نیشتیمان و ده‌ستكه‌ڤتێن وێ یێن كوب رێكا قوربانیدانا خه‌لكێ كوردستانێ ب ده‌ستڤه‌هاتین بكه‌ت.
زێده‌تر سه‌رۆكێ حكومه‌تێ به‌حس ل هندێ كر، كابینه‌یا نه‌هێ پترین زانیاری به‌لاڤكرینه و روونكرنێن پێدڤی داینه په‌رله‌مانێ كوردستانێ و رایا گشتی.
ژلایه‌كێ دیڤه مه‌سرور بارزانی دیاركر، كوردستان ل ده‌ڤه‌ره‌كا پری قه‌یران و نه ئارامدا دژیت و ل سالێن بووری رووبروو چه‌ندین قه‌یرانان بوویه، وه‌ك كورونا، قه‌یرانا ساخله‌می و دارایی، لێ دسه‌ر هندێ را ئه‌و نه راوه‌ستیاینه و ل سه‌ر بجهئینانا پرۆژه‌یێ چاكسازییێ دهه‌موو بیاڤاندا دبه‌رده‌ومن، لێ چاكسازی پرۆژه‌یه‌كێ به‌رده‌وامه و پێدڤی ب ده‌می نه و ئارمانجا وان ژ ڤێ چاكسازییێ دانانا ژێرخانه‌كا ب هێز یا ئابوورییه، و حكومه‌ت یا هه‌رێما كوردستانێ هه‌موویێ یه و بێی جوداهی خزمه‌تا پارێزگه‌هـ و ده‌ڤه‌رێن كوردستانێ دكه‌ت.
و ل دووماهییێ سه‌رۆكێ حكومه‌تێ به‌رسڤا تێبینییێن ئاماده‌بوویان دان و كورتییه‌ك ل دۆر چاكسازییا كابینه‌یا نه‌هێ یا حكومه‌تا هه‌رێما كوردستانێ دهه‌موو بیاڤاندا دیاركر.
