ئاژانسا خانی ھوورکاریێن ئاڤاکرنا شوقێن کرێداران ئاشکرادکەت

بەرپرسەکێ دەستەیا وەبەرئینانێ ئاشکراکر، بڕیارا سەرۆکایەتییا جڤاتا وەزیران ئه‌وه‌ كو شوقێن کرێداران د دەمێ دو سالان بھێنە ئاڤاکرن و دبێژیت، نێزیکی دێ جھێ ئاڤاکرنا شوقێن کرێداران ھێتە دیارکرن.

ھەڤال سەدیق، رێڤەبەرێ مۆھلەتدانێ ل دەستەیا وەبەرئینانێ بۆ ئاژانسا خانی دیارکر، ھێشتا جھێ ئاڤاکرنا شوقێن کرێداران نەھاتییە دیارکرن، سێ رۆژە فەرمان ل سەرۆکایەتییا جڤاتا وەزیران دەرکەفتییە و نڤیسار بۆ ھەموو باژێڕڤانییان  ھاتییەکرن دەمەکێ زوو جھێ ئاڤاکرنا شوقێن کرێداران بھێتە دیارکرن، شوقێن کرێداران دێ ب کوالێتییەکا باش ھێنە ئاڤاکرن و ژلایێ رێکخراوەکا بسپۆر سەرپەرشتییا ئاڤاکرنا شوقان ھێتەکرن، ھژمارەکا لیژنەیێن دیژی دێ چاڤدێرییا ئاڤاکرنا شوقان کەن.

رێڤەبەرێ مۆھلەتدانێ ل دەستەیا وەبەرئینانێ گۆتژی: ب بڕیارا مەسروور بارزانی سەرۆکێ حوکمەتا ھەرێما کوردستانێ شوقێن کرێداران ب شێوەیەکێ شەفاف دێ ھێنە بەلافکرن، ئانكو شوقە دێ ب تنێ بۆ خەلکێ ھەژار و کرێداربن، چەند خالەک ژی بۆ کەسێن مفادار ھاتینە دیارکرن ، ھەتا ئەو وەبەرھێنەرێ شوقا ئاڤا دکەت دڤێت بشێوەیەکێ شەفاف کار بکەت.

دکتۆر ھەڤال سەدیق ئاشکراکر، نڤیسار بۆ وەبەرھێنەران ھاتییەکرن و تێدا دو پێشنیار ھاتینەکرن، دەمێ بجهـ ئینانا پڕۆژەی دو سالن و پێشنیاز ھاتییەکرن ددەمێ ڤان دو سالاندا 30% ێ پارە بھێتە وەرگرتن و 70%ێ بۆدەمێ پازدە سالا بشێوەیێ قست بھێتە وەرگرتن، پێشنیازێن دیژی ھەنە و چاڤەڕێی وەبەرھێنەران دکەین بۆ رازیبوونا وان لدۆر پێشنیارا وەبەرئینانێ لدۆر شێوەیێ وەرگرتنا پارەی.