رێبه‌ر ئه‌حمه‌د: ژ كه‌سێ قه‌بوول ناكه‌ین چه‌كێ بێى موله‌ت هه‌لبگریت

وه‌زیرێ نافخۆ یێ هه‌رێما كوردستانێ رێبه‌ر ئه‌حمه‌دى دپرێسكۆنفرانسه‌كى دا راگه‌هاند، ئه‌و ژ كه‌سێ قه‌بوول ناكه‌ن سه‌رپێچییێ بكه‌ت و چه‌كێ بێى موله‌ت هه‌لبگریت خۆ ئه‌گه‌ر چ پله‌ و پوست ژى هه‌بیت، و زێده‌تر دیاركر پشتى دانوستاندنێن دگه‌ل سه‌رۆك وه‌زیران، ئه‌وا دانوستاندن دگه‌ل پارێزگارێن هه‌رێما كوردستانێ و سه‌رپه‌رشتێن ئیداره‌یێن سه‌ربه‌خۆ ژى كر، و بریار هاته‌ دان هه‌موو ئه‌و جهێن موله‌تا فرۆتنا چه‌كى هه‌یى و ئه‌وێن موله‌ت نه‌یژى ب زوورى بهێنه‌ داخستن.

هه‌روه‌سا رێبه‌ر ئه‌حمه‌دى دیاركر، ئه‌و هه‌ست پێ دكه‌ن كو دیارده‌یا ب كارئینانا چه‌كى و ته‌قه‌كرن و كوشتنێ ل پارێزگه‌هێن هه‌رێما كوردستانێ به‌ره‌ڤ زێده‌بوونێ چوویه‌، له‌وما ئه‌وان بریاردا هه‌ر زوو ئه‌و جهێن چه‌كى دفرۆشن چ مۆله‌ت هه‌بیت یان نه‌بیت بهێنه‌ گرتن.

ژلایه‌كێ دیڤه‌ وه‌زیرێ نافخۆ ئاشكراكر، گه‌له‌ك جهێن فرۆتنا چه‌كى هاتینه‌ داخستن و پێدڤییه‌ ب زووترین ده‌م جهێن دیژى بهێنه‌ داخستن، و هه‌ر كه‌سێ داخوازا موله‌تا هه‌لگرتنا چه‌كى بكه‌ت، دڤێت بایومه‌ترى ژ وه‌زاره‌تا نافخۆ هه‌بیت، و هه‌ر كه‌سێ ده‌ستكارییێ ل تابلۆ و ره‌نگێن ترۆمبێلان بكه‌ت دێ هێته‌ ده‌سته‌سه‌ركرن،  ئه‌و كه‌سێن خوه‌ مه‌زن و وه‌ك كورێن به‌رپرسان دبینن دێ هێنه‌ جزادان.

هه‌روه‌سا رێبه‌ر ئه‌حمه‌دى دیاركر، ژ چ كه‌سان ناهێته‌ قه‌بوولكرن سه‌رپێچییێ بكه‌ت و چه‌كێ بێى موله‌ت هه‌لگبریت خوه‌ ئه‌گه‌ر چ پۆست ژى هه‌بیت، هه‌روه‌سا جهێن هه‌لگرتنا چه‌كى بۆ پێشمه‌رگه‌ى دێ هێنه‌ درووستكرن داكو چه‌كى دگه‌ل خوه‌ نه‌به‌نه‌ مال، و هێزێن ئێمناهییێ بۆ بجهئینانا قانوونێ دێ هێنه‌ ب كارئینان.