مه‌فره‌زه‌ بۆ ده‌سته‌سه‌ركرنا چه‌كێ بێ موله‌ت دێ هێنه‌ دانان

پارێزگارێ دهوكێ رادگه‌هاند: ژ ئه‌ڤرۆ وێڤه‌ مه‌فره‌زێن هه‌ڤپشك دێ ده‌ست ب چالاكییان كه‌ن بۆ ده‌ست ب سه‌رداگرتنا چه‌كێ بێ موله‌ت و رێكارێن قانوونى دێ گرنه‌ به‌ر وان كه‌سێن چه‌كێ بێ موله‌ت هه‌لدگرن، و هه‌موو مامه‌لێن به‌رامبه‌رى چه‌كى دێ هێنه‌ سنووردار كرن.

د.عه‌لى ته‌ته‌ر پارێزگارێ دهوكێ ده‌رباره‌ى كۆنترۆلكرنا چه‌كێ بێ موله‌ت ل سنوورێ پارێزگه‌ها دهوكێ، دكونگره‌كێ روژنامه‌ڤانى دا گوتى: ژ ئه‌ڤرۆ وێڤه‌ مه‌فره‌زه‌ بۆ ده‌سته‌سه‌ركرنا چه‌كێ بێ موله‌ت دێ هێنه‌ دانان و هه‌ر كه‌سه‌كێ موله‌تا چه‌كى نه‌بیت یان ب سه‌ر سازییه‌كا ئێمناهییێ ڤه‌ نه‌بیت دێ چه‌ك ژێ هێته‌ وه‌رگرتن، و  داخواز ژ خه‌لكى كر هه‌ر كه‌سه‌كێ چه‌كێ بێ موله‌ت هه‌بیت راده‌ستى قانوونێ بكه‌ت یان موله‌تێ بۆ چه‌كێ خوه‌ درووست بكه‌ت.

 ل حه‌فتییا بورى شه‌ش كه‌س ل هه‌رێما كوردستانێ ب چه‌كى هاتینه‌ كوشتن كو چار ل هه‌ولێرێ، ئێك ل دهوكێ و ئێك ژى ل سه‌یدسادق بوو.