چیایی ته‌یمور: هه‌ڤدژى دناڤبه‌را لایه‌نێن شیعى دا ل سه‌ر گه‌له‌ك بابه‌تێن گرێدایى ب پێكئینانا حكومه‌تا نوو یا عیراقی ڤه‌ هه‌نه‌

ئه‌ندامه‌كێ په‌رله‌مانێ عیراقێ دیاركر، ده‌وله‌تا قانوونێ كو مه‌زنترین كوتله‌یا په‌رله‌مانییه‌، نورى مالكى بۆ پۆستێ سه‌رۆك وه‌زیرێن عیراقێ به‌ربژاركرییه‌.

چیایی ته‌یمور، ئه‌ندامێ جڤاتا نوونه‌رێن عیراقێ بۆ ئاژانسا خانى ئاشكرا كر: ده‌وله‌تا قانوونێ مه‌زنترین كوتلا په‌رله‌مانییه‌ و مالكى سه‌رۆكاتییا وێ دكه‌ت، وان مالكى بۆ سه‌رۆك وه‌زیرێن عیراقێ هه‌لبژارتییه‌‌ و چارچۆڤێ هه‌ڤبه‌ندییێ ژى ئه‌و هه‌لبژارتییه‌ و به‌رى نوكه‌ ژى مالكى سه‌رۆك وه‌زیرێن عیراقێ بوویه‌، هه‌كه‌ ڤێ جارێ ژى ببیته‌ سه‌رۆك وه‌زیر، دێ رێگرى ل حكومه‌تێ و ئایندێ وێ هێته‌ كرن و سه‌در دێ  هه‌ڤدژییا وى كه‌ت، ژبه‌ركو ده‌مێ مالكى سه‌رۆك وه‌زیر گه‌له‌ك ئاسته‌نگ و نه‌خۆشى بۆ سه‌درى چێكربوون و سه‌ره‌ده‌رییه‌كا خراب ل گه‌ل وى دكر، لێ سه‌درى سه‌ره‌ده‌رییه‌كا باش ل گه‌ل هادى عامرى و قه‌یس خه‌زعه‌لى هه‌یه، هه‌ر چه‌نده‌ پشتى ئینانا ناڤێ مالكى وه‌كو به‌ربژارێ سه‌رۆك وه‌زیرێن عیراقێ” پشته‌ڤانێن سه‌درى چ هه‌لویست دیارنه‌كرینه‌ و نوكه‌ سه‌در ژ دوورڤه‌ ته‌ماشه‌ى روودانان دكه‌ت، ژبه‌ركو سه‌در سه‌ركردێ ئێكانه‌یه‌ كو بشێت ب توویته‌كى ملیۆن كه‌سان بینیته‌ سه‌ر جادێ.

ناڤهاتى گۆت ژى: نوكه‌ هه‌ڤدژى دناڤبه‌را لایه‌نێن شیعى ژى دا ل سه‌ر گه‌له‌ك بابه‌تێن گرێدایى ب پێكئینانا حكومه‌تا نوو یا عیراقێ هه‌نه‌ ، هه‌روه‌سا پارتی دڤێت پشكدارییێ د حكومه‌تا نوو یا عیراقێ دا بكه‌ت، نه‌ ژ بۆ ب ده‌ستڤه‌ئینانا پله‌ و پۆستان، به‌لكو ژبه‌ر هندێیه‌ بشێت به‌رژوه‌ندییێن خه‌لكێ كوردستانێ ب پارێزیت، ژبه‌ر هندێ پارتى یا رژده‌ ب مه‌رج پشكدارییێ تێدا بكه‌ت، هه‌روه‌سا سه‌رۆك بارزانى ژى دووپاتى ل هندێ كرییه‌، دڤێت ئه‌و پشكدارییه‌ ل سه‌ر بنه‌مایێ ده‌ستووری و ته‌وافوق و شه‌راكه‌تێ بیت، دیسان ئه‌و ئاریشێن هه‌لاویستى یێن دناڤبه‌را هه‌رێمێ و به‌غدا دا بهێنه‌ چاره‌سه‌ر كرن، ژ وان ژى مادێ 140 و قانوونا نه‌فت و گازێ و مافێن پێشمه‌رگه‌یى” مه‌ پێ باشه‌ ئه‌و ئاریشه‌ هه‌موو بهێنه‌ چاره‌سه‌ر كرن.