جێگرێ سه‌رۆك ئه‌ركانێن پێشمه‌رگه‌یێ كوردستانێ لیوا رۆكن هوشمه‌ند و به‌رپرسێ تیما هاریكار یا ئاسایشا ئه‌مریكا ل هه‌رێما كوردستانێ كۆلۆنێل سان بوروى سه‌ره‌دانه‌كا مه‌یدانى بۆ میره‌یا گشتى یا وه‌زاره‌تا پێشمه‌رگه‌یى كر، و ژلایێ رێڤه‌به‌رێ میره‌یا گشتى ره‌فعه‌ت عومه‌ر و جێگرێ وى عه‌قید فه‌رمان زراریڤه هاتنه پێشوازیكرن، و دووڤدا سه‌ره‌دانا هه‌موو به‌شێن میره‌یا گشتى كر و ل سه‌ر چه‌وانییا كوگه‌هكرن و به‌لاڤكرنا كه‌لوپه‌ل و پێدڤییێن سه‌ربازى ل یه‌كه‌یێن سه‌ربازى راوه‌ستییان.
رێڤه‌به‌رییا میره‌یا گشتى و شاندێ مێڤان كۆكبوون كو ب زووترین ده‌م بنگه‌هێن سه‌ربازى یێن دهۆك و سلێمانییێ بكه‌ڤنه كارى، داكو بشێن ب له‌ز پێدڤى و هاریكارییان بگه‌هیننه وان یه‌كه‌یێن سه‌ربازى ئه‌وێن ل سنوورێن پارێزگه‌هێن خوه هاتینه دانان، و هاریكارییا میره‌یا گشتى بۆ ب رێڤه‌برنا كارێن وێ ب شێوه‌یه‌كێ باشتر بكه‌ن.
سه‌رۆكایه‌تییا ئه‌ركانان به‌شه‌ك ژ پلانێن وه‌زاره‌تا پێشمه‌رگه‌ی یه، و دنوكه‌دا كار ل سه‌ر باشتركرن و رێكخستنا یه‌كه‌یێن هه‌ستیار و گرنگ ل ناڤ وه‌زاره‌تا پێشمه‌رگه‌یى ب تایبه‌ت دبیاڤێن لوجستى، گه‌هاندن، كۆگه‌هكرن، ب رێڤه‌برنا مامه‌له‌یێن وه‌رگرتن و به‌لاڤكرنا كه‌لوپه‌لێن سه‌ربازى دا دهێته‌كرن.
