حکومەتا ئەمەریکا تۆپبارانکرنا هاڤینگەهەکا سنوورێ پارێزگەها دهۆکێ ئیدانەکر و راگەهاند، پشتەڤانییا ئاسایش و ئارامییا عیراق و هەرێما کوردستانێ دکەین.
نێد پرایس، پەیڤدارێ وەزارەتا دەرڤە یا ئەمریکا راگەهاند، “ویلایەتێن ئێکگرتی یێن ئەمریکا ئێدانەیا هێرشا سنوورێ پارێزگەها دهۆکێ دکەت، کو ببو ئەگەر وەلاتییێن سڤیل شەهید و بریندار ببن.”
پەیڤدارێ وەزارەتا دەرڤە یا ئەمریکا:” کوشتنا وەلاتییێن سڤیل تشتەکێ قەبیلکری نینە، پێدڤییە هەمی دەولەت پێگیری یاسایێن ڤیڤدەولەتی ببن، ژ وان ژی پاراستنا خەلکێ مەدەنی.”
ناڤهاتی دیارکر،” پرسە و سەرەخۆشییێن خۆ ئاراستەی مالباتێن کوشتییان دکەین و هەڤخەمییا خۆ ئاراستەی برینداران دکەین.”
نێد پرایس دوپاتکر، ویلایەتێن ئێکگرتی یێن ئەمەریکا پشتەڤانییا سەروەری، ئاسایش، ئارامییا و خۆشگوزەرانییا عیراق و هەرێما کوردستانێ دکەن.
