ل بەغدا مەسرور بارزانی و مستەفا کازمی کۆمبوون و گوتوبێژ لسەر هێرشێن تورکیا بۆ سەر دەڤەرێن سنووری و دوسەیێن نەفتێ کرن، هەردوو لا رێککەفتن لسەر کوورکرنا دانوستاندنان دناڤبەرا وەزارەتا نەفتا فیدڕال و وەزارەتا سامانێن سروشتی یا هەرێما کوردستانێ و بەردەوامیدان و درێژەدان ب کارکرن ژ پێخەمەت گەهشتن ب چارەسەرییەکا هەڤپشک.
دەقێ راگەهاندنا کۆمبوونێ:
مەسرور بارزانی، سەرۆکێ حکومەتا هەرێما کوردستان ، ل کۆشکا حکومی ل به‌غدا دگەل سەرۆک وەزیراێن فیدراڵ مستەفا کازمی کۆمبوو.
د چارچوڤێ دیدارا خۆ دا، گوتوبێژ دەربارەی تەمام دوسەیێن نشتیمانی و وان پرسا هاتنە کرن کو بۆ ژیانا وەلاتییان د گرنگن، هەر وەسا پێشکێشکرنا خزمەتگوزارییان و رێیێن بەردەوامیدانێ ب کارێ هەڤپشک دناڤبەرا هەولێر و بەغدا دا هاتنە گوتوبێژکرن، ب وی ئاراستەی کو ئاسایشا خوارنێ بۆ تەمام ئیراقییان بهێتە دەستبەرکرن و بەردەوامییێ ب دابینکرنا شایستان بدەت و ژیانەکا سەر بلندانە بۆ دابین بکەت.
هه‌ردوولا ب توندی ده‌ستدرێژییێن توركیا بۆ سه‌ر ئاخا ئیراقێ ئیدانه كرن، ب تایبه‌ت هێرشا ڤێ دوماهییێ، كو ژ ئەگەرێ وێ ژمارەکا وەلاتییێن بێ تاوان بوونە قوربانی و دوپاتی ژی ل گرنگییا رێککەفتن لسەر دیتنەکا ئێکگرتی بۆ سەرەدەریکرن دگەل وان دەستدرێژی و ڤەکۆلین ژ ئەگەرا کر، ب وی ئاراستەی کو سەروەرییا ئیراقێ بهێتە پاراستن و کار لسەر وێ چەندێ بهێتە کرن، د ئایندەی دا نەهێتە پێشلکرن.
هه‌روه‌سا گوتوبێژ دەربارەی هەماهەنگییا ئەمنی دناڤبەرا هێزێن ئەمنی یێن فیدرال و هێزێن پێشمەرگەی و گرنگی دا و بەردەوامیدان ب بەرهەنگاربوونا گەفێن داعش و رێکخراوێن تیرۆرستییێن دی هاتە کرن، ئەڤەژی ژ پێخەمەت پشتراستبوون ژ هندێ کو جارەکا دی نەبنە گەف بۆ سەر ئاسایشا ئیراقێ.
د دیدارێ دا ڕێیە چارە بۆ لێکەفتێن تەحەدیاتێن ئابووری گوتوبێژکرن، کو جیهان و دەڤەر تێدا دەرباز دبن، هەر وەسا گرنگییا دەستبەرکرنا رەوسەکا گونجای بۆ گەشەپێدانا ئابووری، دەربارەی ڤێ چەندێ ژی دوپاتی ل گرنگییا بهێزکرنا میکانزمێن هاریکاری و هەماهەنگییا هەڤپشک دناڤبەرا حکومەتا فیدڕال و حکومەتا هەرێما کەردستانێ هاتە کرن، ژ پێخەمەت باشکرنا ژینگەها کاری، راکێشانا وەبەرهێنەران و بەرفرەهکرنا زێدەکرنا ژێدەرێن داهاتی.
هه‌ر د ڤی چوارچووڤەی دا، رێککەفتن لسەر کوورکرنا دانوستاندنان دناڤبەرا وەزارەتا نەفتا فیدڕال و وەزارەتا سامانێن سروشتی یا هەرێما کوردستانێ و بەردەوامیدان و درێژەدان ب کارکرنا هەڤپشک و گەهشتن ب رەوشەکا ئێکگرتی د برێڤەبرنا دوسەیێن نەفتی دا، ب رەنگەکی کو بەرژەوەندییێن بلند یێن گەلێ ئیراقێ بدەستڤە بهێن.
ل دوماهییا دیدارێ، سەرۆک وەزیرێن فیدڕال، دوپاتی ل گرنگییا کارکرنێ ب گیانێ ئێک تیم و گرنگیدان ب تشتێن هەڤپشک کر ب وی رەنگی کو ئاسایش و ئارامی و بەرەڤپێشڤەچوون بۆ گەلێ ئیراقێ ب هەموو پێکهاتان ڤە دابین بکەت.
