سه‌رۆكێ هه‌رێما كوردستانێ په‌یامه‌كا پیرۆزباهییێ ئاراسته‌یى بزاڤا گۆران ب هه‌لكه‌فتا بوورینا 13 سالان ل سه‌ر دامه‌زراندنا وێ كر و راگه‌هاند، بزاڤا گۆران وه‌كو هێزه‌كا سیاسى یا كارا رۆله‌كێ دیار دژیانا سیاسى یا هه‌رێما كوردستان و عیراقێ دا هه‌یه.
سه‌رۆكێ هه‌رێما كوردستانێ نێچیرڤان بارزانى دپه‌یاما خوه‌دا دیاركر، دڤێ هه‌لكه‌فتێ دا ئه‌و دووپاتییێ ل گرنگى و پێدڤییا ته‌بایى و ئێك رێزییا دناڤبه‌را لایه‌نێن سیاسى یێن هه‌رێما كوردستان و به‌رپرسیاره‌تییا هه‌ڤپشك یا هه‌موو لایان و پێكهاتێن وێ بۆ ده‌ربازكرنا ئالوزى و رووبرووبوونا ئاسته‌نگان كر.
ده‌قێ په‌یاما پیرۆزباهییا نێچیرڤان بارزانى:
به‌رێزان جڤاتا نیشتیمانى یا بزاڤا گۆران
هه‌لكه‌فتا 13 سالێن دامه‌زراندنا بزاڤا هه‌وه ب گه‌رمى ل هه‌وه و هه‌موو هه‌ڤسوز و لایه‌نگر و جه‌ماوه‌رێ بزاڤا گۆرانێ ب گشتى پیرۆز دكه‌م و داخوازا سه‌ركه‌ڤتنێ بۆ هه‌وه دكه‌م.
بزاڤا گۆران وه‌ك هێزه‌كا سیاسى یا كارا، رۆله‌كێ دیار دژیانا سیاسى یا هه‌رێما كوردستان و عیراقێ دا دگێریت و سه‌نگ و شوون تبلێن وێ دپرۆسه‌یا سیاسى و ب رێڤه‌برنا هه‌رێما كوردستانێ دا یا دیاره.
دڤێ هه‌لكه‌فتێ دا دووپاتییێ ل گرنگى و پێدڤییا ته‌بایى و ئێك رێزییا هه‌موو لایه‌نێن سیاسى یێن هه‌رێما كوردستانێ و به‌رپرسییاره‌تییا هه‌ڤپشك یا هه‌موو لایه‌نان و پێكهاتێن وێ بۆ ده‌ربازكرنا ئالۆزى و رووبرووبوونا هه‌ڤركییان و كارێ پێكڤه بۆ پاراستنا قه‌واره‌یێ سیاسى و ده‌ستكه‌ڤت و مافێن ده‌ستوورى یێن هه‌رێما كوردستانێ دكه‌م.
