به‌ره‌كێ مێژوویى یێ ل سه‌ر ده‌مێ ئاشورییان ل به‌رده‌ره‌شێ هاته‌ دیتن

ل ده‌مێ كاركرنێ ل ئێك ژ كێلگه‌هێن پتاتان ل گوندێ تۆبزاوا یێ سنوورێ قه‌زایا به‌رده‌ره‌شێ، به‌ره‌كێ مێژوویى هاته‌ دیتن، و ئێك ژ شوونوارناسان دیاركر، مێژوویا وى به‌رى بۆ سه‌رده‌مێ ئاشوورییان ڤه‌دگه‌ریت.

 شوونوارناس عومەر حسێن شەریف بۆ ئاژانسا خانی راگەهاند، ئه‌و ژلایێ جووتیاره‌كیڤه‌ هاته‌ ئاگه‌هداركرن كو به‌ره‌كێ شوونه‌وارى ل ناڤ زه‌ڤییه‌كا پتاتان ل گوندێ تۆبزاوا یێ سه‌ر ب ناحییا رۆڤیا یا سنوورێ باژێركێ به‌رده‌ره‌شێ ڤه‌ دیتییه‌، و پشتى وان سه‌ره‌دانا ئه‌وى جهى كرى، ده‌ركه‌ڤت كو به‌ره‌كێ مێژوویى یه‌ و ل دووڤ ڤه‌كۆلینێن ده‌ستپێكێ ئه‌و به‌ره‌ بۆ سه‌رده‌مێ ئاشوورییان كو دوو هزار سالان پێش زایینى ل وێ ده‌ڤه‌رێ حوكم كرییه‌ ڤه‌دگه‌ریت، و زێده‌تر دیاركر، ئه‌ڤ به‌ره‌ رێنڤێسا مێخى ( بسمارى ) ل سه‌ر بوو و شێوێ وى یێ چوارگوشه‌یه‌ و كێشا وى نێزیكى دوو ته‌نایه‌.

عومه‌ر حسێنى باس ل هندێ ژى كر، ئه‌و به‌ره‌ بۆ رێڤه‌به‌رییا شوونه‌وارو كه‌له‌پوورى یا ئاكرێ هاتییه‌ ڤه‌گوهاستن داكو زێده‌تر ڤه‌كۆلین ل سه‌ر بهێنه‌كرن و بهێته‌ پاراستن.

ئه‌وى شوونه‌وارى ئاشكرا ژى كر، ده‌ڤه‌را به‌رده‌ره‌ش و گورانه‌تى ژلایێ شوونوارانڤه‌ گه‌له‌ك یا ده‌وله‌مه‌نده‌، لێ ژبه‌ر نه‌بوونا فه‌رمانگه‌هه‌كا شوونه‌وارى ل قه‌زایا به‌رده‌ره‌ش، ئه‌ڤ لایه‌نه‌ هاتییه‌ پشتگوهـ خستن، له‌وما داخوازێ ژ حكومه‌تا هه‌رێما كوردستانێ دكه‌ن به‌شێ شوونوار و كه‌لوپووران ل به‌رده‌ره‌شێ ڤه‌كه‌ت، داكو زێده‌تر گرنگییێ ب ڤى كه‌رتى بده‌ن، ژبه‌ركو ژلایێ شوونوارانڤه‌ هه‌تا نوكه‌ ئه‌و ب سه‌ر ئاكرێ ڤه‌نه‌.