ل سالا بهێت هه‌موو هێزێن یه‌كه‌یێن 70 و 80 دێ هێنه رێكخستن و هه‌تا نوكه 20 لیوایێن هێزێن پێشمه‌رگه‌ى ب هه‌ماهه‌نگییا هێزێن هه‌ڤپه‌یمانان هاتینه رێكخستن.
جێگرێ رێڤه‌به‌رییا گشتى یا میره ل وه‌زاره‌تا پێشمه‌رگه‌ى عه‌قید فه‌رمان فه‌رهاد بۆ فه‌رمانگه‌ها میدیا و زانیارییان ل حكومه‌تا هه‌رێما كوردستانێ راگه‌هاند، رێكخستن ل ژناڤبرنا دوومه‌چه‌یى و مووچه‌یێن نه‌قانوونى هاتییه كرن و هه‌تا نوكه 31 هزار و 382 ئه‌فسه‌ر و پێشمه‌رگه ب رێكا هژمارێن بانكى مووچه‌یێ خوه وه‌ردگرن، و دوو لیوایێن دى ژى ل ژێر پرۆسه‌یا رێكخستنێ نه، بریاره ل سالا بهێت ب هه‌ماهه‌نگییا وه‌زاره‌تا پێشمه‌رگه‌ى و سه‌رۆكایه‌تییا ئه‌ركانان هه‌موو هێزێن یه‌كه‌یێن 70 و 80 ب وه‌زاره‌تا پێشمه‌رگه‌یڤه بهێنه گرێدان.
عه‌قید فه‌رمان فه‌رهادى ئه‌وژى دیاركر، دكابینه‌یا نه‌هێ دا گرنگییه‌كا مه‌زن ل پێدانا راهێنانان ب هێزێن پێشمه‌رگه‌یێ كوردستانێ هاتییه دان، و ب هه‌ڤپشكییا هێزێن هه‌ڤپه‌یمانان هه‌تا نوكه زێده‌تر ژ 60% یا هێزێن پێشمه‌رگه‌ى پشكدارى دراهێنانێن له‌شكه‌رى دا كرییه و ئه‌ڤ پرۆسه دێ یا به‌رده‌وام بیت.
ل دوور سه‌نگه‌ر و پر چه‌ككرنا هێزێن پێشمه‌رگه‌ى عه‌قید فه‌رمانى ئاشكراكر، هه‌موو سه‌نگه‌رێن پێشمه‌رگه‌ى هاتینه موكومكرن و بۆ هه‌ر رووبرووبوونه‌كا دوژمنێن كوردستانێ د به‌رهه‌ڤن، دنوكه‌دا چه‌كێ پێدڤى و گرنگ بۆ هێزێن سه‌ر ب وه‌زاره‌تا پێشمه‌رگه‌یڤه هاتییه دابینكرن، و چه‌ك و كه‌لوپه‌لێن له‌شكه‌رى یێن پێدڤى ل به‌ر ده‌ستێ هه‌موو هێزانه.
