ل سەر پێشنیازا کۆلیژا پەروەردا بنیات ل زانکۆیا دهۆک و ب سەرپەرشتییا د. لقمان هادی حەسەن، هاریکارێ سەرۆکێ زانکۆیێ بۆ کاروبارێن زانستی و خواندنا بلند و ب ئامادەبوونا بەرپرسێ هۆبا بۆلۆنیا پرۆسێس د. ئیسماعیل ئەمین، ب پشکدارییا کولیژێن پەروەردا بنیات (دهۆک و ئامێدییێ) و پەروەردا ئاکرێ، کۆمبوونەک هاتە كرن، کو دانانا سیستەمەکێ هەڤپشک دبوارێ بابەتێن پراکتیکی و تیۆری و مەشق و راهێنانێ و دابەشکرنا نمرەیان دا، تەوەرێ سەرەکییێ کۆمبوونێ بوو.
د.موئەید بەرەکات، هاریکارێ راگرێ کولیژا پەروەدا بنیات ل زانکۆیا دهۆک دیارکر، ئەڤ کۆمبوونە وەکو پێشنیاز ژلایێ کۆلیژا مە ڤە هاتییە كرن، ب مەرەما دانانا سیستەمەکێ هەڤپشک کۆ جوداهی دناڤبەرا کولیژێن پەروەردا بنیات (دهۆک و ئامێدییێ) و پەروەردا ئاکرێ دا نەبن.
د. موئەیەد بەرەکات ئەوژی ئاشكراكر، ل دووماهییا کۆمبوونێ هژمارەکا بۆچوونان ل دۆر دانانا سیستەمەکێ هەڤپشک ل کولیژێن ناڤبری یێن زانکۆیا دهۆک هاتنە پێشنیازکرن ، کو پتر خورتکرنا هەماهەنگییێ دناڤبەرا زانکۆیا دهۆک و رێڤەبەرییا گشتی یا پەروەردێ دبوارێن دەستنیشانکری دا و هەبوونا سەرەدانێن بەردەوام بۆ قوتابخانان دگەل ڤان پێشنیازا بوون.
