ب بریارا مه‌سرور بارزانى هاریكارییێن خۆدان پێدڤییێن تایبه‌ت دێ دبه‌رده‌وامبن

سه‌رۆكێ حكومه‌تا هه‌رێما كوردستانێ مه‌سرور بارزانى بریاردا پێدانا هاریكارییان ب ئه‌وان خۆدان پێدڤییێن تایبه‌ت یێن كو مووچه‌یێ خانه‌نشینییێ وه‌ردگرن یا به‌رده‌وام بیت.

فه‌رمانگه‌ها میدیا و زانیارى یا حكومه‌تا هه‌رێما كوردستانێ راگه‌هاند، ژ چارچووڤه‌یێ گرنگیدانا كابینه‌یا نه‌هێ یا حكومه‌تا هه‌رێما كوردستانێ ب خزمه‌تكرنا هه‌موو ته‌خ و چینێن هه‌رێما كوردستانێ و ژ پێخه‌مه‌ت پاراستنا ماف و ئیمتیازاتێن كێم ئه‌ندام و خۆدان پێدڤییێن تایبه‌ت و به‌رچاڤ وه‌رگرتنا بارێ ژیانا ئه‌وان، ئه‌ڤرۆ 25ى ته‌باخا 2022ێ، ب فه‌رمانا سه‌رۆكێ حكومه‌تا هه‌رێما كوردستانێ مه‌سرور بارزانى، بریار هاته‌ دان پێدانا هاریكارییێن كێم ئه‌ندامان ب ئه‌وان خۆدان پێدڤییێن تایبه‌ت یێن كو مووچه‌یێ خانه‌نشینییێ وه‌ردگرن یا به‌رده‌وام بیت.

ل دووڤ داتایه‌كا وه‌زاره‌تا كار و كاروبارێن جڤاكى، حكومه‌تا هه‌رێمێ هه‌یڤانه‌ نه‌هـ ملیار و 200 ملیۆن دیناران د ده‌ته‌ 107 هزار كێم ئه‌ندامان، و پشتى چاكسازییا حكومه‌تێ دلیسته‌یا مووچه‌ خۆراندا، دیاربوو كو ژماره‌كا ئه‌وان كه‌سێن مووچه‌یێ خانه‌نشینییێ وه‌ردگرن، ب نه‌قانوونى مووچه‌ی وه‌ردگرن.