مه‌سرور بارزانى، سه‌رۆكێ حكومه‌تا هه‌رێما كوردستانێ ب هه‌لكه‌فتا سیهـ و چواره‌مین سالڤه‌گه‌را ئه‌نفالا بادینان په‌یامه‌ك به‌لاڤكر.
ده‌قێ په‌یاما سه‌رۆكێ حكۆمه‌تێ:
ل شالاوا ئه‌نفالا بادینان، كۆ دوماهى قۆناغا شالاوێن ئه‌نفالێ بوو، رژێما عیراقێ وه‌ك هه‌مى ده‌ڤه‌رێن دى یێن كوردستانێ تاوانه‌كا هۆڤانه به‌رامبه‌ر خه‌لكێ ده‌ڤه‌را بادینان ئه‌نجام دا و ژ ئه‌نجامێ وێ شالاوێ كۆ چه‌كێ قه‌ده‌غه‌كرى تێدا هاته بكارئینان، ب هزاران كه‌س هاتنه شه‌هید و بێ سه‌روشوین كرن، ب ده‌هان هزار كه‌س ژى ئاواره و ده‌ربده‌ربوون، و ب سه‌دان گوند ژى هاتنه وێران كرن.
د سیهـ و چواره‌مین سالڤه‌گه‌را ئه‌وێ تاوانا درنده دا، ب رێز ڤه یادا قۆربانییێن ئه‌نفالا بادینان دكه‌ین و جاره‌كادى دۆپات دكه‌ین كۆ پێدڤى یه حكومه‌تا عیراقێ ل گوره‌ى ده‌ستوورى زیانڤێكه‌فتى و كه‌سوكارێن قۆربانییێن شالاوێن ئه‌نفالان و تاوانێن رژێما پێشتر یا عیراقێ ب ره‌نگه‌كێ شایسته قه‌ره‌بوو بكه‌ت كۆ مافه‌كێ ره‌وا یێ خه‌لكێ سته‌ملكێرى یێ كوردستانێ یه.
هه‌روه‌سا پێدڤى یه ئه‌و عه‌قلیه‌تا ل پشت ئه‌نجام دانا ڤان كاره‌سات و تاوانان نه‌مینیت و رێگرى ل دووباره‌بوونا وان كۆمه‌لكوژییان بهێته‌كرن.
ل سالڤه‌گه‌را ئه‌نفالا بادینان دا، سلاڤ بۆ گیانێ پاك یێ ئه‌نفالكرییێن بادینان و سه‌رجه‌م شه‌هیدێن كوردستانێ.
مه‌سرور بارزانى
سه‌رۆكێ حكومه‌تا هه‌رێما كوردستانێ
25ى ئابا 2022
