نێچیرڤان بارزانى، سه‌رۆكێ هه‌رێما كوردستانێ ب هه‌لكه‌فتا سیهـ و چواره‌مین سالڤه‌گه‌را ئه‌نفالا بادینان په‌یامه‌ك به‌لاڤكر.
ده‌قێ په‌یاما سه‌رۆكێ هه‌رێما كوردستانێ:
ئه‌ڤرۆ یادا سیهـ و چواره‌مین سالڤه‌گه‌را ئه‌نفالێن بادینان دكه‌ین كۆ وه‌ك دوماهى قۆناغا ئه‌نفالێ ل 25ى ئاب تا 6ى ئه‌یلولا سالا 1988ێ سۆپایێ وى ده‌مى یێ عیراقێ ده‌رهه‌ق ب پێكهاتێن جوداجودا یێن خه‌لكێ بادینان ئه‌نجام دا. سه‌رێ رێزێ بۆ گیانێ پاك یێ شه‌هیدان د چه‌مینین و ب رێزڤه وێ یادێ دكه‌ین، سلاڤان بۆ خێزان و كه‌سوكارێن وان د هنێرین.
تاوانێن ئه‌نفالێ كۆ هه‌ر ژ گه‌رمیان هه‌تا دوماهى قۆناغێ ل بادینان، 182 هزار وه‌لاتییێن بێتاوان یێن كوردستانێ تێدا بوونه قۆربانى و هاتنه شه‌هیدكرن، وه‌ك دادگه‌ها بلند یا تاوانان یا عیراقێ دانپێداناى، جینوساید و تاوانا جه‌نگى و تاوانێن دژى مرۆڤایه‌تییێ نه، بوویه پێدڤى یه حكومه‌تا فیدرالى یا عیراقێ قه‌ره‌بوویا كه‌سوكارێن وان قۆربانییان بكه‌ت. ل هه‌رێما كوردستانێ ژى دڤێت خزمه‌تا زێده‌تر یا كه‌سوكارێن قۆربانییێن وان بهێته‌كرن و دگه‌ل دكیۆمێنت كرنا تاوانان، هه‌مى بزاڤ بهێنه‌كرن ژبۆ وێ یه‌كێ كۆ ل سه‌ر ئاستێ ناڤده‌وله‌تى وه‌ك جینۆساید بهێته ناساندن.
د ڤێ یادێ دا، دۆپاتییێ ل ئێكرێزى یا لایه‌نێن سیاسى و پێكهاتێن هه‌رێما كوردستانێ دكه‌ین كۆ تاكه گه‌ره‌نتییا پاراستنا مافێن ده‌ستوورى و ده‌ستكه‌فتێن هه‌رێما كوردستانێ و داهاتییه‌كێ باشتر یێ نه‌وه‌یێن مه‌یه، هه‌ر ئه‌ڤ چه‌نده ژى دێ بیته رێگر ل دووباره‌بوونا ئه‌وان تاوانان یێن ب درێژاهییا دیرۆكێ ده‌رحه‌ق ب هه‌مى پێكهاته و ئاخ و ئاڤ و هه‌وا وسرۆشت و ژینگه‌ها كوردستانێ هاتینه‌كرن.
یادا شه‌هیدان هه‌رده‌م یا بلند بیت، سۆپاس و رێز و پێزانین بۆ جوامێرى یا خه‌لكێ هه‌ولێر و به‌حركێ و ده‌وروبه‌رێن وێ كۆ ل كه‌مپا جێژنیكان د هانایا لێقه‌ومایێن بادینان چووین و هاریكارییا وان كرى، دلۆڤانى یا وان چ جاران ناهێته ژبیركرن.
