مەسرور بارزانی، سەرۆکێ حکومەتا هەرێما کوردستانێ د ئاهەنگا دەرچوونا قوتابییێن زانکۆیا هەولێرێ یا پزیشکی پشتى پێشكێشكرنا خه‌لاتێ ڕێزلێنانێ بۆ قوتابییان گوتاره‌ك پێشكێشكر و دیاركر، گه‌له‌ك یێ كه‌یف خۆشم ئه‌ڤرۆ ئه‌ز دگه‌ل هه‌وه و بەختەوەرم كو من پشكدارى د ئاهه‌نگا ده‌رچوونێدا كرى، پیرۆزباهیێ ل هه‌وه دكه‌م و هیڤیدارم د قوناغێن بهێت یێن ژیانا كاریدا د سه‌ركه‌فتى بن بۆ خزمه‌تكرنا كوردستانێ، هه‌روه‌سا ده‌ستخۆشیێ ل ده‌یك و باب و كه‌سوكارێن هه‌وه دكه‌م كو گه‌له‌ك بزاڤ كرینه داكو هین د سه‌ركه‌فتى بن، هەروەسا سوپاسییا سەرۆك و جڤاتا زانكۆیا هەولێرێ یا پزیشكی و هه‌مى مامۆستایێن ئەڤێ زانكۆیێ دكه‌م بۆ ئەرك و ماندوویبوونا وان د پێشئێخستنا زانكۆیێ و پێگه‌هاندنا ئه‌ڤان قوتابییان جهێ ده‌ستخۆشیێیه.
مەسرور بارزانی گۆت: هوین دێ بنه پزیشك هیڤیدارم و پشتراستم هوین دێ د ئاستێ پیرۆزییا كارى و سویندخوارنێدا بن، پزیشكی كار و ئه‌ركه‌كێ گه‌له‌كێ پیرۆز و مرۆڤانییه و ئارمانج ژێ ڕزگاركرنا ژیانا خه‌لكى و پاراستنا ساخله‌میێییه، هیڤیدارم به‌رى هه‌ر تشته‌كى لایه‌نێ مرۆڤایه‌تى د كاریدا ل به‌رچاڤ بیت.
سەرۆکێ حکومەتا هەرێمێ دیاركر: بێگومان قۆناغه‌كا ژیانا ده‌رچوویان ب دوماهیك هات به‌لێ فێربوون ب دوماهیك ناهێت چونكى فێربوون پرۆسەیەكا بەردەوامە د ژیانا مرۆڤیدا و مرۆڤ د ژیانێدا پێدڤییه به‌رده‌وام بیت د بزاڤێن دووڤچوونا زانست و زانیاری و فێربوونێدا، ب تایبەت بوارێ پزیشكی و ساخله‌مى وەك گه‌له‌ك بوارێن دى د پێشكەفتنا بەردەوام دانه، دڤێت هوین د بزاڤێن به‌رده‌وام دابن ل پێناڤ ب ده‌ستڤه‌ئینانا زانیاریێن نوى هه‌تا بشێن زێده‌تر خزمەتا خه‌لك و جڤاكێ خوه و مرۆڤایه‌تی ب گشتى بكه‌ن.
هه‌روه‌سا مەسرور بارزانی ڕاگه‌هاند: د ده‌مێ بووریدا حكومەتا هەرێما كوردستانێ ل پێناڤ گرنگیدان و پێشئێخستنا ئاستێ زانستی و ئەكادمی ل زانكۆ و سازیێن په‌روه‌ردێ، دەستەیه‌كا با‌وه‌ریێ بۆ پرۆگرام و سازیێن پەروەردی و خواندنا بلند پەسەندكر. ئەڤ دەستەیە ئارمانج ژێ بلندكرنا كوالێتییا خواندن و پەروەردەیێ ل هەرێما كوردستانێ بوو، د ئه‌ڤان سالێن بووریدا ئه‌م شاهدین ئاستێ زانكۆیێن مه بلندبوویه، بۆ هندێ ئه‌م بشێن ڕكابەریا زانكۆیێن دى بكه‌ین، مه پێدڤى زانی ئەڤێ دەستەیێ ب دامه‌زرینین بۆ هندێ زانكۆیێن مه پله‌یا وان د ئاستێ جیهانێدا بلندبن و ئاستێ خواندنێ ل كوردستانێ بلندبیت.
