ب هەلكەفتا دەربازبوونا 61 سالان ب سەر شۆرەشا ئیلۆنێ، سەرۆكێ حكومەتا هەرێما كوردستانێ پەیامەك بەلاڤكر.
دەقێ پەیاما سەرۆكێ حكومەتێ:
ئەڤرۆ یادا مەزنترین شۆرەشا گەلێ كوردستانێ دكەین كۆ شۆرەشا مەزن یا ئیلونێ یە. ئەو شۆرەشە وەچەرخانەكا دیرۆكی و شۆرەشەكا سەرتاسەری یا خەلكێ كوردستانێ بوو ب گشت پێكهاتێن نەتەوەی و ئاینێن جیاواز ڤە، ب سەركردایەتییا رابەرێ نەتەوەی یێ مە مستەفا بارزانی یێ نەمر.
ئێك ژ گرنگترین و بهادارترین تایبەتمەندییێن شۆرەشا ئیلۆنێ، ئێكرێزی و ئێكگرتنا گەلێ كوردستانێ بوو، كۆ ب ئەگەرێ خوراگری و ئیرادا ب هێز یا خەلكێ كوردستانێ دوژمن نەچار بوو دانپێدانێ ب پشكەكا مافێن نەتەوەی یێن رەوا یێن گەلێ كوردستانێ بكەت د چارچووڤێ رێكەفتنا یازدەی ئادارێ دا.
هەروەسا گرنگترین شوناسا شۆرەشا ئیلۆنێ، گوهورینا راپەرین و خەباتا دەڤەری بوو بۆ شورەشەكا نەتەوەی یا سەرتاسەری ل هەمی كوردستانێ و درۆستكرنا هەستێ نەتەوەی ل دەڤ هەمی وەلاتییێن كوردستانێ.
ئەڤرۆ یادا شۆرەشا مەزن یا ئیلۆنێ دكەین، پێدڤی یە هەمی لایەن و پێكهاتێن كوردستانێ، ئێك هەلویست و ئێكدەنگ بن ل پێناڤی داكوكیكرن و پاراستنا مافێن دەستووری و دەستكەفتێن نەتەوەی، كۆ خەلكێ كوردستانێ ب دەهان سالایە ل پێناڤی وان خەباتێ دكەت و قۆربانییێن مەزن داینە.
ل سالیادا شۆرەشا ئیلۆنێ، ب رێزڤە یادا پێشمەرگە و پشكدارێن وێ شۆرەشا مەزن یا گەلێ كوردستانێ دكەین.
سلاڤ ل گیانێ پاك یێ شەهیدێن شورەشا ئیلونێ و سەرجەم شەهیدێن كوردستانێ.
