فه‌رمانگه‌ها میدیا و زانیارییان راگه‌هاند، كابینه‌یا نه‌هێ یا حكومه‌تا هه‌رێما كوردستانێ سه‌ربارى زالبوونێ ل سه‌ر قه‌یران و رووبرووبوونان، د شه‌ش هه‌یڤێن ده‌ستپێكێ یێن ئه‌ڤ ساله‌دا زێده‌تر ژ 628 ملیۆن دولاران قه‌رێن سالێن به‌رێ یێن كۆمپانییێن نه‌فتێ داینه.
كۆمپانییا دیلویت یا تایبه‌ت ب هووربینییێن داهات و فرۆشتنا نه‌فتا هه‌رێما كوردستانێ د دووماهى راپۆرتا خوه‌دا راگه‌هاند، ل ده‌ستپێكا هه‌یڤا نیسانێ هه‌تا دووماهییا هه‌یڤا خزیرانێ، كوژمێ ئێك ملیار و 635 ملیۆن و 695 هزار و 597 دولاران ژ داهاتێ نه‌فتا هه‌رێما كوردستانێ وه‌ك شایسته و قه‌رێن كۆمپانییان داینه، هه‌روه‌سا 584 ملیۆن و 609 هزار و 407 دولار وه‌ك خه‌رجییێن ڤه‌گوهاستن و كوگه‌هكرنێ هاتینه ته‌رخانكرن.
هه‌ر ل دووڤ داتایێن كۆمپانییا دیلویت، دوى ماوه‌یدا 37 ملیۆن و 608 هزار و 577 به‌رمیلێن نه‌فتێ ب 100.38 دولاران ب رێكا بۆرییان هاتینه فرۆتن، و 237 هزار و 475 به‌رمیل ب 54.08 دولاران ب پالاوگه‌هێن نافخۆ هاتینه فرۆشتن.
د داتایاندا هاتییه، سه‌رجه‌مێ نه‌فتا فرۆتى دوان سێ هه‌یڤاندا سێ ملیار و 789 ملیۆن و 290 هزار و 279 دولار بوون، و كوژمه‌ی ئێك ملیار و 571 ملیۆن و 985 هزار و 275 دولار بۆ مووچه‌ى هاتینه ته‌رخانكرن.
