رێڤه‌به‌رێ نه‌فت و كانزایێن دهۆكێ دیاركر، هه‌تا نوكه زێده‌تر ژ 10 هزار و 700 كه‌سان ل سنۆرێ پارێزگه‌ها دهۆكێ گازا سپى وه‌رگرتییه، و رۆژانه 400 هزار لیترێن گازا سپى دهێنه به‌لاڤكرن، و گوت : بۆ به‌لاڤكرنا گازا سپى ب سه‌ر هه‌موو خێزانێن پارێزگه‌ها دهۆكێ دا، ئه‌وان پێدڤى ب نێزیكى 56 ملیۆن لیترێن گازا سپی هه‌یه.
محسن تاها رێڤه‌به‌رێ نه‌فت و كانزایان ل پارێزگه‌ها دهۆكێ بۆ ئاژانسا خانى ئاشكراكر، پرۆسه‌یا به‌لاڤكرنا گازا سپى ل دهۆكێ ل رۆژا 20ى ئه‌ڤێ هه‌یڤێ ده‌ستپێكرییه، و دقۆناغا ئێكێدا ل سنۆرێ ناحییا بێگۆڤا، قه‌زا باتیفا ل ئیداره‌یا زاخۆ، ناحییێن كانى ماسێ و شێلادزێ ل ئامێدییێ هاتییه به‌لاڤكرن.
رێڤه‌به‌رێ نه‌فت و كانزایێن دهۆكێ گوت ژى : هه‌تا نوكه زێده‌تر ژ 10 هزار و 700 خێزانان گازا سپى وه‌رگرتییه و نێزیكى دو ملیۆن و 140 هزار لیتران هاتینه به‌لاڤكرن، پرۆسه یا به‌رده‌وامه و رۆژانه نێزیكى 400 هزار لیترێن گازا سپى ب سه‌ر دو هزار خێزاناندا دهێنه به‌لاڤكرن.
زێده‌تر محسن تاهاى ل دۆر شێوازێ به‌لاڤكرنا گازا سپى دیاركر، ل حه‌فتییا بهێت به‌لاڤكرن دێ ل سنۆرێ ناحییێن ده‌ركار و دینارته بیت، و پشتى به‌لاڤكرن ل ده‌ڤه‌رێن چیایى بدووماهى دهێت، دێ ل ناڤه‌ندێن باژێران ده‌ستپێكه‌ت.
رێڤه‌به‌رێ نه‌فت و كانزایان ل دهۆكێ به‌حسا كوالیتییا ئه‌وێ گازێ كر گوت : كوالیتییا گازێ گه‌له‌ك یا باشه.
هه‌روه‌سا ل دۆر شێوازێ به‌لاڤكرنا گازێ ل پارێزگه‌هان ئاماژه ب هندێ دا، به‌لاڤكرنا نه‌فتێ ل پارێزگه‌ها دهۆكێ دێ ب شێوه‌یێ كۆبوونان بیت و ئامار دێ ژ بریكارێن ئاهێن خوارنێ هێنه وه‌رگرتن و پاش دێ هه‌ماهه‌نگى دگه‌ل ئیداره‌یێن باژێر و ناحییان هێته‌كرن.
سه‌باره‌ت به‌لاڤكرنا گازێ ب سه‌ر هه‌موو پارێزگه‌ها دهۆكێدا، رێڤه‌به‌رێ نه‌فت و كانزایێن دهۆكێ گوت : بۆ هندێ كو هه‌موو خێزان ل پارێزگه‌ها دهۆكێ نه‌فتێ وه‌ربگرن، پارێزگه‌هـ پێدڤى ب نێزیكى 56 ملیۆن لیترێن گازا سپییه، و هه‌تا نوكه ئاریشه‌یێن گازا شل ل پارێزگه‌ها دهۆكێ نه‌بوویه.
