بالیۆزا ئه‌مریكا ل عیراقێ راگه‌هاند، هه‌رێما كوردستانێ دێ رۆله‌كێ گه‌له‌كێ گرنگ د سه‌ركه‌ڤتن و شكه‌ستنا حكومه‌تا نوو یا عیراقێدا گێریت، داكو عیراق یا سه‌ركه‌ڤتى بیت، پێدڤییه هه‌ولێر و به‌غدا پێكڤه كاربكه‌ن، و گوت: ل هه‌رێما كوردستانێ ژى یا گرنگه كورد نافمالا خوه رێكبكه‌ن داكو ده‌نگێ وان ل به‌غدا بهێزتر بیت.
ئه‌لینا رۆمانوڤسكى بالیۆزا ئه‌مریكا ل ده‌مێ پێشكێشكرنا گوتاره‌كێ ل دیدارا میرى داخواز ژ د. له‌تیف ره‌شید سه‌رۆككومارێ عیراقێ و محه‌مه‌د شیاع سوودانى سه‌رۆكوه‌زیران كر، سوزێن خوه بكه‌نه كریار.
رۆمانۆڤسكى پابه‌ندبوونا وه‌لاتێ خوه ب رێككه‌ڤتنا دگه‌ل عیراقێ دووپاتكر و راگه‌هاند، پشته‌ڤانییا وان بۆ عیراقێ ژلایێ ئێمناهییێ ڤه دێ یا به‌رده‌وام بیت، و ئه‌مریكا دێ ل عیراقێ مینیت.
بالیۆزا ئه‌مریكا ل عیراقێ گوت : ئه‌مریكا بۆ چ جهان ناچیت و ژ ڤێ ده‌ڤه‌رێ دوورناكه‌ڤیت، سه‌رۆك بایدنى گه‌له‌ك جاران ئه‌و چه‌نده یا روونكرى كو ئه‌مریكا هه‌ڤپشكا ده‌ڤه‌رێیه و دێ مینیت، له‌وما هه‌ر كه‌سێ گومانه‌ك هه‌بیت، ئه‌و بۆ دووپات دكه‌ت كو ژ ڤێرێ دوورناكه‌ڤن.
