ئه‌ڤرۆ جڤاتا پارێزگه‌ها دهۆكێ كۆمبوو و كێشه‌یا ئاهێن خوارنێ و گیرۆبوونا به‌لاڤكرنا وان گۆتبوبێژ كر و چه‌ندین بریارێن گرنگ د ڤێ ده‌ربارێ دا ده‌ركرن.
ئه‌ڤرۆ رۆژا پێنجشه‌مبێ 16/11/2022 جڤاتا پارێزگه‌ها دهۆكێ، كۆمبوونا خوه یا ئاسایی یا ژماره 131 ب سه‌رۆكاتییا بێريڤان سه‌ليم، جێگرا سه‌رۆكێ ئه‌نجومه‌نی گرێدا و 5 ته‌وه‌رێن سه‌ره‌كی گۆتبوبێژ كرن، گرنگترین ئێك كێشه‌یا ئاهێن خوارنێ و گیرۆبوونا به‌لاڤكرنا وان بوو.
ته‌وه‌رێ سه‌ره‌كی یێ كۆمبوونێ ده‌ربارێ كێشه و گرفتێن ئاهێن خوارنێ بوو كو جڤاتێ ل سه‌ر گازندێن خه‌لكێ پارێزگه‌هێ لژنه‌یه‌كا تایبه‌ت راسپاردبوو و وێ لژنێ دیڤچوونا پرسێن گیرۆبوونا به‌لاڤكرنێ، مانا ئه‌رزاقی د كۆگه‌هان دا و هه‌روه‌سا بابه‌تێن گرێدای كۆگه‌هكرنێ و كوالێتیێ كرییه.
لژنه‌یا تایبه‌ت د كۆمبوونا ئه‌ڤرۆ دا هه‌موو ورده‌كاری ب داتا ئێخستن به‌رچاڤ و پشتی دانوستاندنا ئه‌ندامان ب پرانیا ده‌نگان ئه‌ڤ بڕیاره هاتنه په‌سه‌ند كرن:
-
ل دۆر كێشه‌یا ئاهێن خوارنێ و گیرۆبوونا به‌لاڤ كرنا وان، بڕیار هاته دان نڤیساره‌ك بۆ پارێزگه‌ها دهۆكێ/ كارگێرییا گشتی بهێته هنارتن كو:
– پێدڤییه هه‌می ئه‌رزاقێ د كۆگه‌هان دا مای و نه‌هاتییه به‌لاڤكرن، د ده‌مێ مه‌هه‌كێ دا ل سه‌ر وه‌لاتییان بهێته به‌لاڤكرن و چاڤدێرییا بازرگانی دویڤچوونا وی ئه‌رزاقی بكه‌ت ئه‌وێ د كۆگه‌هان دا مایی ژ بۆ پشتراستبوونێ ژ سلامه‌تی و خرابنه‌بوونا ئه‌رزاقی.
– بۆ سالا نوی گرێبه‌ست ل گه‌ل 3 به‌لێنده‌ران بهێته گرێدان، ژ به‌ر كو به‌لێنده‌ره‌ك یا كۆمپانیایه‌ك ب تنێ نه‌شێت ئه‌ركێ به‌لاڤكرنا ئه‌رزاقێ هه‌موو پارێزگه‌هێ ب ستۆیێ خوه ڤه بگریت.
-
بڕیارا هاته دان ب ده‌نگێن 20 ئه‌ندامێن جڤاتێ ژ سه‌رجه‌مێ 24 ئه‌ندامێن ئاماده‌بوویی، ب په‌سه‌ند كرنا خانم دلمان محه‌مه‌د حسێن وه‌ك ئه‌ندام د جڤاتا باژێرڤانیا بجیل دا.
-
بڕیار هاته دان ب تێكرایا ده‌نگێن ئه‌ندامێن جڤاتاێ، ب به‌رفره‌هكرنا سنۆرێ گوندێ (سمریت) یێ سه‌ر ب قه‌زایا شێخان ڤه.
-
بریارا هاته دان ب تێكرایا ده‌نگێن ئه‌ندامێن جڤاتێ، ب ره‌دكرنا هه‌لگرتنا پارێزبه‌ندیێ ل سه‌ر سه‌باح عه‌لی بابیری ئه‌ندامێ جڤاتا پارێزگه‌هێ، ل دۆر وێ سكالایا ل سه‌ر هاتیه تۆمار كرن ل دادگه‌ها به‌راهییا دهۆكێ.
