سه‌رۆكا نوو یا وه‌زیرێن ئیتالیا نامه‌یه‌ك بۆ مه‌سرور بارزانى هنارت

سه‌رۆكا نوو یا وه‌زیرێن ئیتالیا نامه‌یه‌ك بۆ سه‌رۆك وه‌زیرێن هه‌رێما كوردستانێ هنارت و تێدا به‌حسا په‌یوه‌ندییێن ئیتالیا و هه‌رێما كوردستانێ كر، و دیاركر ئه‌و چاڤه‌رێیه‌ ل ده‌رفه‌ته‌كا نێزیك دگه‌ل سه‌رۆكێ حكومه‌تا هه‌رێمێ كۆمببیت.

سه‌رۆكا نوو یا وه‌زیرێن ئیتالیا جۆرجیا میلۆنى دنامه‌یا خوه‌دا بۆ سه‌رۆك وه‌زیرێن هه‌رێما كوردستانێ مه‌سرور بارزانى دیاركر، په‌یوه‌ندییێن دوستانه‌ یێن ئیتالیا و هه‌رێما كوردستانێ مێژویه‌كا دوور و درێژ هه‌یه‌، هه‌ردوو لایه‌ن درووبرووبوونا ئاسته‌نگێن ئاسایش و سه‌قامگێرییێدا هه‌ڤپشكن.

سه‌رۆكا وه‌زیرێن ئیتالیا حه‌زا وه‌لاتێ خوه‌ بۆ مۆكۆمكرنا په‌یوه‌ندییان دگه‌ل هه‌رێما كوردستانێ ب تایبه‌تى دپێشڤه‌برنا په‌یوه‌ندییێن دوو لایانه‌ دبوارێن ئالوگورا بازرگانى و چاندن و وزێدا دووپاتكر.

هه‌روه‌سا جورجیا میلۆنى دیاركر، ئه‌و ئومێده‌واره‌ كو پێكئینانا حكومه‌تا نوو یا عیراقێ ببیته‌ ئه‌گه‌رێ بهێزكرنا په‌یوه‌ندییێن هه‌ولێر و به‌غدا ژ پێخه‌مه‌ت گه‌هشتن ب ئارمانجێن هه‌ڤپشك و ئاشتى و گه‌شه‌پێدان و خۆشگوزه‌رانییێ.

ل دووماهییا نامه‌یا خوه‌ سه‌رۆكا نوو یا وه‌زیرێن ئیتالیا بۆ مه‌سرور بارزانى دیاركر، ئه‌و چاڤه‌رێیه‌ ل ده‌رفه‌ته‌كا نێزیك وان ببینیت و دگه‌لدا كۆمببیت.