پشتیوان سادق: پارتى دێ هه‌موو هاریكارییان كه‌ت كو هه‌تا هه‌یڤا 10 هه‌لبژارتن بهێنه‌كرن

ئه‌ندامه‌كێ شاندێ پارتى دیمۆكراتى كوردستان دووپاتى ل هندێ كر، حزبا وى دێ هه‌موو ئاسانكارى و هاریكارییان پێشكێشكه‌ت داكو هه‌تا هه‌یڤا 10 یا ئه‌ڤ ساله‌ هه‌لبژارتن بهێنه‌كرن.

پشتیوان سادق ئه‌ندامێ شاندێ پارتى د پرێسكۆنفرانسه‌كیدا كو دگه‌ل ئه‌ندامێن شاندێ گۆران پشتى كۆمبوونا هه‌ردوو حزبان سازكربوون، دیاركر، ئه‌و خۆشحال بوون دگه‌ل ئێك ژ هه‌ڤپه‌یمانێن خوه‌ یێن یێن سه‌ره‌كى كو بزاڤا گۆرانه‌ كۆمبوون، دڤى ده‌میدا وان سه‌ره‌دانا هه‌ر ئێك ژ ( ئێكه‌تى، ئێكگرتۆیا ئیسلامى، كۆمه‌لا دادگه‌رى، حزبا شیوعى، حزبا زه‌حمه‌تكێشان ) و حزبێن دى كۆمبوون و دێ ل سه‌ر ڤان كۆمبوونان دبه‌رده‌وامبن.

هه‌روه‌سا ئاشكراكر، وان دگه‌ل گۆرانێ ب پێدڤى زانى دانوستاندنێ ل دۆر ژماره‌یه‌كا بابه‌تان بكه‌ن و ئێك ژ وان بابه‌تێ هه‌لبژارتنان بوو، كو یا گرنگه‌ هه‌لبژارتن ل ده‌مێ خوه‌ بهێنه‌كرن، ژبه‌ركو ئه‌گه‌ر هه‌لبژارتن ل هه‌رێما كوردستانێ نه‌هێنه‌كرن، ئه‌زمونا هه‌رێما كوردستانێ دێ كه‌ڤیته‌ ژێر پرسیارێ، و پارتى یا ئاماده‌یه‌ هه‌موو ئاسانكارى و هاریكارییه‌كێ بۆ هندێ بكه‌ت كو هه‌تا هه‌یڤا 10 یا ئه‌ڤ ساله‌ هه‌لبژارتن بهێنه‌كرن.