ھاوار محەمەد: چو بەھانە بۆ پاشخستنا پرۆسا ھەلبژارتنان نه‌ماینه‌

ئاژانسا خانی” تایبەت:

بەرپرسەکێ دەزگەھێ ھەلبژارتنێن پارتی دیموکراتی کوردستان دیار کر، پارتی یا رژدە ل سەر ئه‌نجامدانا پرۆسا ھەلبژارتنان و چ بەھانە نەماینە بۆ پاشخستنا ھەلبژارتنان، لەوما پێدڤییە کار بۆ برێڤەچوونا وێ پرۆسێ بھێتە کرن.

ھاوار محەمەد، بەرپرسێ قانوونی ل دەزگەھێ ھەلبژارتنێن پارتی بۆ ئاژانسا خانی دیار کر” پارتی ھەر ل دەستپێکێ ل گەل رێڤەچوونا ھەلبژارتنێن ھەرێما کوردستانێ بوویە و سالا بوری ژی ھەر چەندە ژڤانێ ھەلبژارتنان ژلایێ سەرۆکێ ھەرێما کوردستانێ ھاتبوو دیار کرن، بەلێ ھندەک لایەنێن سیاسی ئاستەنگ بۆ پرۆسا ھەلبژارتنان پەیدا کرن و بوونە ئەگەر ھەلبژارتن د دەمێ خوە دا بڕێڤەنەچن و بھێنە گیرۆکرن بۆ ئەڤ سالە.

ناڤهاتی ئاشکرا کر” نوکە چ بەھانەیەک بۆ پاشخستنا پرۆسا ھەلبژارتنان نەمایە و پارتی ھەموو بزاڤەکێ دگەل لایەنێن سیاسی دکەت پرۆسا ھەلبژارتنان ئەڤ سالە د دەمێ خوە بھێتە ئەنجامدان، ھەر لایەنەکێ بخوازیت ئاستەنگان پەیدا بکەت و بەرھەڤ نەبیت بۆ ھەلبژارتنان ئەو لایه‌ن ژ دەنگێن خوە دترسیت، چونکی درێژكرنا ژییێ پەرلەمانی ب تنێ بۆ ھندێ بوویە كو لایەنێن سیاسی بگەھنە رێکكەفتنێ و ئاستەنگ نەمینن، نوکە ئاستەنگ نەماینە و پارتی یا بەرھەڤە کۆمسیۆن بھێتە کارا کرن و قانوونا ھەلبژارتنان ژلایێ پەرلەمانی بھێتە راستڤە کرن.