بانکێن ھەرێما كوردستانێ دێ بنە ئەلکترۆنی

ئاژانسا خانی ، تایبەت:

 رێڤەبەرێ گشتى يێ بانکێن بازرگانی ئاشکرا کر، لدووڤ پلانەکێ دێ بانکێن ھەرێما کوردستانێ ب سیستەمێ ئەلکترۆنی کار کەن و گۆت ژی، ھەتا نوکە سیستەمێ ئەلکترۆنی ل ھژمارەکا بانکێن دھۆک و ھەولێرێ ھاتییە بجهئینان.

مەولود سابیر، رێڤەبەرێ گشتی یێ بانکێن بازرگانی بۆ ئاژانسا خانی دیارکر” لدووڤ پلانا حوکمەتا ھەرێما کوردستانێ پشتی دامەزراندنا بانکا نیشتیمانی ل ھەرێما کوردستانێ بڕیارە ھژمارا بانکێن بازرگانی بھێتە کێمکرن، لدووڤ وێ پلانێ دێ ھندەک بانک ھێنە تێکەلکرن ل گەل بانکێن دی ئەڤە ژی بۆ زێدەتر رێکخستنا کارێن بانکییە ل ھەرێما کوردستانێ، چونکی د نوکە دا زێدەتری ٨٠ بانکێن بازرگانی ل ھەرێما کوردستانێ ھەنە.

ناڤهاتی گۆت ژی” بانکێن  بازرگانی سیستەمێ وان دێ بیتە ئەلکترۆنی و دێ پێکڤە ھێنە گرێدان ھەتا نوکە ھژمارەکا بانکان ل ھەردو پارێزگەھێن ھەولێر و دھۆکێ ب سیستەمێ ئەلکترۆنی پێکڤە ھاتینە گرێدان و کار دھێته‌ کرن بۆ بجهئینانا سیستەمێ ئەلکترۆنی ل ھەموو بانکێن ھەرێما کوردستانێ، سیستەمێ ئەلکترۆنی دێ کاریگەری ھەبیت ل سەر برێڤەبرنا کاروبارێن بانکی کو ب ره‌نگه‌كێ سەردەمییانە کاروبارێن خۆ بڕێڤە ببەن.