پەیڤدارێ حكومەتا هەرێما كوردستانێ راگەهاند، رۆژا ئێكشەمبییا بهێت شاندەكێ هەرێما كوردستانێ ژبۆ درێژەدانێ ب گۆتوبێژان دێ سەرەدانا بەغدا كەت و رێكەفتنا دەستپێكی ل سەر یاسایا بودجێ هاتییەكرن.
ئەڤرۆ جووتیار عادل، پەیڤدارێ حكومەتا هەرێما كوردستانێ د كۆنگرەیەكێ رۆژنامەڤانی دا راگەهاند، شاندێ هەرێمێ د چارچووڤێ سەرەدانێن خوە دا ژبۆ بەغدا دگەل وەزارەتێن دارایی و پەترۆلێ كۆمبوویە و رۆژا ئێكشەمبییا بهێت ژبۆ درێژەپێدانێ ب وان گۆتوبێژان، دێ دوبارە سەرەدانا بەغدا كەت.
دیار ژی كر، رێكەفتنا دەستپێكی ل دۆر پرۆژەیاسایا بودجا 2023ێ یا عیراقێ دناڤبەرا حكومەتا هەرێمێ و حكومەتا عیراقێ دا هاتییەكرن و ئەركێن هەردوولا هاتینە دیاركرن، بەلێ ” هندەك هویركاتی ” ماینە و پێدڤییە گۆتوبێژ ل سەر بهێنەكرن.
