مه‌سرور بارزانى : هه‌رێما كوردستانێ ب چ شێوه‌یان ده‌ستبه‌ردارى ماف و شایسته‌یێن ده‌ستوورى نابیت

جڤاتا وه‌زیرێن هه‌رێما كوردستانێ ب سه‌رپه‌رشتییا مه‌سرور بارزانى سه‌رۆكێ جڤاتا وه‌زیران كۆمبوو و دووماهى پێنگاڤێن ده‌ستنیشانكرنا پشكا هه‌رێما كوردستانێ ژ بوودجه‌یا فیدرال و ئاماده‌كارییێن قانوونا نه‌فت و گازا فیدرال گوتوبێژكرن.

د ئێك ژ برگه‌یێن كۆمبوونێدا ئه‌نجامێن سه‌ره‌دانا شاندێ بلندێ دانوستاندنێن حكومه‌تا هه‌رێما كوردستانێ بۆ به‌غدا و كۆمبوونا دگه‌ل شاندێ دانوستاندكارێ حكومه‌تا فیدرال ل رۆژا 19-2 سه‌باره‌ت پرۆژه‌ قانوونا نه‌فت و گازا ئیتیحادى، ژلایێ ئاوات شێت جه‌ناب وه‌زیرێ دارایى و ئابوورى و ئه‌ندامێن شاندیڤه‌ هاتنه‌ دیاركرن.

سه‌رۆك وه‌زیران زێده‌بارى ده‌ستخۆشیكرنێ ل شاندێ هه‌رێمێ دووپاتكر، هه‌رێما كوردستانێ هه‌رده‌م دگه‌ل هندێ بوویه‌ ئاریشه‌یێن دگه‌ل حكومه‌تا فیدرال ب رێكا دانوستاندنان و ب شێوه‌یه‌كێ بنه‌ره‌تى ل سه‌ر بنه‌مایێن ده‌ستوورى بهێنه‌ چاره‌سه‌ركرن و بۆ ڤێ مه‌ره‌مێ ژى، ئه‌و بۆ هه‌ر هه‌ماهه‌نگى و هاریكارییه‌كێ دگه‌ل حكومه‌تا فیدرال د ئاماده‌نه‌، ژبه‌ركو چاره‌سه‌رنه‌كرنا ئاریشه‌یان زیانێ ب به‌رژه‌وه‌ندییێن هه‌موو وه‌لاتییێن عیراقێ دگه‌هینیت.

سه‌رۆكێ حكومه‌تا هه‌رێما كوردستانێ مه‌سرور بارزانى دووپات ژى كر، هه‌رێما كوردستانێ ب چ شێوه‌یان ده‌ستبه‌ردارى ماف و شایسته‌یێن ده‌ستوورى نابیت.

جڤاتا وه‌زیران بریاردا سووبه‌هى هه‌ردوو تیمێن هه‌رێما كوردستانێ یێن تایبه‌ت ب پرۆژه‌ قانوونا بوودجه‌یا فیدرال و پرۆژه‌ قا نوونا نه‌فت و گازێڤه‌، سه‌ره‌دانا به‌غدا بكه‌ن و درێژییێ ب گوتوبێژان ل سه‌ر تمامكرنا پێنگاڤانێن ده‌ستنیشانكرنا پشكا هه‌رێما كوردستانێ ژ بوودجه‌یا فیدرال بكه‌ن، هه‌روه‌سا دانوستاندنان ل دۆر به‌رهه‌ڤییێن پرۆژه‌ قانوونا نه‌فت و گازا فیدرال بكه‌ن.