وەلاتی دشێن ل شوینا دۆلاری پارەی بدەنە قستێن وەبەرھێنانێ

ئەندامەکێ لژنا ئابووری ل پەرلەمانێ عێراقێ بۆ ئاژانسا خانی دیارکر، بڕیار ل سەر قستێن وەبەرھێنانێ ھاتیەدان و ئیدی وەلاتی دشێن ل شوینا دۆلاری، دینارێ عیراقی بدەنە کۆمپانیێ و 100 دۆلار ب 132 ھزار دیناران ھاتیە ھژمارتن.

سیپان شێروانی، ئەندامێ لژنا ئابووری ل پەرلەمانێ عیراقێ بۆ ئاژانسا خانی دیارکر” ئەڤرۆ ئەم وەکی لژنا ئابووری دگەل پارێزگارێ بانکا ناڤەندی کۆمبووینە و ئێک ژوان ئاریشەیێن وەبەرھێنان بۆ دانا پارەی بھێتە چارەسەرکرن، چونکە پشتی بلندبوونا بھایێ دۆلاری کارتێکرن ل سەر وەلاتیان ھەبوویە، چونکە کڕین و فرۆتن و دانا قستان بۆ پڕۆژێن وەبەرھێنانێ ھەموو ب دۆلاریە، لەوڕا بڕیار ھاتەدان ئیدی وەلاتی دشێن قستێن وەبەرھێنانی ب دیناری بدەن، ھەر وەلاتیەکێ قست ل سەر ھەبن ل پڕۆژێن وەبەرھێنانێ ئیدی دشێت ل شوینا دۆلاری دینارێ عیراقی بدەتە کۆمپانیێ.

سیپان شێروانی گۆتژی” ل گورەی ئەڤێ بڕیارێ 100 دۆلار ھەمبەری 132 ھزار دیناران ھاتیە دیارکرن، واتە ئەگەر وەلاتیەکی شوقە یان خانی کڕیبیت ل پڕۆژەکی دشێت پارێ عیراقی بدەتە کۆمپانیێ بۆ نموونە ل شوینا 300 دۆلارێن ئەمریکی دێ 396 ھزار دینارێن عیراقی دەتە کۆمپانیێ، بانکا ناڤەندی ژی دێ ئەڤی پارەی بۆ کۆمپانیێن وەبەرھێنانێ کەتە دۆلار ب ھەمان بھایێ ھاتیە دیارکرن، ئەڤێ بڕیارێ دێ کارتێکرنێن باش لسەر وەلاتیان ھەبن و د بەرژەوەندیا وەلاتیاندایە.