ب تنێ ل سالا 2022 ێ نێزیكی 150 ته‌نێن ده‌رمانان هاتینه ره‌تكرن، ب ئه‌گه‌رێ ب سه‌رڤه‌چوون و ده‌رنه‌چوونا وان ده‌رمانان ژ پشكنینێ و نه‌بوونا وان ده‌رمانان د لیستا نیشتمانی یا ده‌رمانان دا.
فەرمانگەها میدیا و زانیاری یا حکومەتا هەرێما کوردستانێ ڕاگەهاند: ژ پێخه‌مه‌تی ئاسایشا ساخله‌مییێ و كۆنترۆڵكرنا جۆری و بهایێ دەرمانان، حكومەتا هەرێما كوردستانێ ب ڕێیا كەرتێ ساخله‌مییێ، دێ پتر گرنگییێ ب جۆر و کوالێتییا دەرمانان ده‌ت؛ بۆ وی مه‌ره‌مێ ژی بنگه‌هێ کوالێتییا كۆنترۆڵی بۆ ئینانا ده‌رمانان، کو پشت ب بنەمایێن زانستی دبەستیت، ل هه‌موو دەرگه‌هـ و خاڵێن سنووری و فڕۆكخانێن هەرێما كوردستانێ دا هەیە؛ داكو چ ده‌رمان بێی مۆڵه‌تا کوالێتییا كۆنترۆڵی نه‌ھیته دناڤا كوردستانێ دا.
د. شێروان سادق، رێڤەبەرێ کوالێتییا كۆنترۆلا دەرمانان، ل وەزارەتا ساخله‌مییا حكومەتا هەرێما كوردستانێ ڕاگەهاند: د پڕۆسا پشكنین و هه‌ڵسه‌نگاندنێ دا، ل ده‌ستپیكێ هه‌ڵسه‌نگاندن بۆ وان دۆكیۆمێنتان دهێته كرن یێن كو بۆ پشكنینا ده‌رمانان پێدڤی، پاشی نموونا وان ده‌رمانان ب هه‌ڕەمە‌كی وه‌ردگرین و ڤرێدكه‌ینه ناڤا تاقیگه‌ها کوالێتییا كۆنترۆڵی یا ده‌رمانان و ب ڕێیا تاقیگه‌ها كیمیایی و فیزیایی و بایلۆژی دهێنه پشکنین كرن؛ هه‌كه ژ پڕۆسا پشكنینێ ده‌رچوو، دێ مۆڵه‌ت ب وان ده‌رمانان هێته دان و ستیكه‌رێ ب کارئینانێ دێ پێ هێته‌دان، هه‌كه ژ وان پشکنینێن هوور ده‌رنه‌چوو، دێ هێنه ژناڤ برن، یان ژی ل سه‌ر داخوازییا وێ كۆمپانییێ دوباره دێ پشكنین بۆ هێته كرن.
